QPL: Kóshbasshy komandalar jeńilistiń aşy dámin tatty
ASTANA. QazAqparat - Búgin elimizdiń eki qalasynda fýtboldan Premer-lıga komandalary arasyndaǵy birinshiliktiń 23-týr oıyndary ótti. Petropavlda «Qyzyljar» Almatynyń «Qaıratyn», Qaraǵandyda «Shahter» elordanyń «Astana» komandasyn qabyldady, dep habarlaıdy QazAqparat tilshisi.
Týrnır kestesinde sońǵy oryndardyń birinde turǵan «Qyzyljar» úshin bul oıynda jeńistiń aýadaı qajet bolǵany belgili. Al «Qaırat» júldege iligý taǵdyryn erterek sheship qoıdy. Sondyqtan búgingi kezdesýge negizinen jastardy qosty. Olardyń qataryna Vladımır Plotnıkov, Eldos Ahmetov, Georgıı Jýkov, Islambek Qýat syndy tájirıbeli jigitter qosyldy.
Soǵan qaramastan «Qaırat» goldy alǵash bolyp soqty. Ol 6-mınýtta Magamed Paragýlgovtyń enshisine jazyldy. Budan keıin alań ıeleri sapynan Tımýr Mýldınov 37-mınýtta tarazy basyn teńestirip ketti. Al 80-mınýtta jeńis goly soǵyldy. Petropavl klýbynyń gambııalyq shabýylshysy Momodý Sıseı «Qaırat» qaqpasynan sańylaý tapty. Esep - 2:1. Úsh upaıdy qorjynǵa salǵan «Qyzyljar» týrnır kestesinde 33 upaımen segizinshi orynǵa kóterildi. Atalmysh komanda osylaısha tómengi topqa túsip qalý qaýpi bar aımaqtan uzaı tústi.
Elordalyq «Astana» da Qaraǵandyǵa qosalqy quramdy alyp bardy. Alǵashqy mınýttan negizgi quramǵa shyqqandar qatarynda barlyǵy jastar bolyp tabylady. «Shahterdiń» de týrnır kestesindegi jaǵdaıy máz emes. Sondyqtan «Astana» jastaryn jeńýge bar kúshin saldy. Bul kezdesýde «Shahter» shabýylshysy Oralhan Ómirtaev 21, 27 jáne 41- mınýttarda het-trık jasady. Oǵan 86-mınýtta «Astana» oıynshysy Ramazan Kárimov bir golmen jaýap qaıyrdy. Atalmysh jeńisten keıin «Shahter» 32 upaı jınady. Týrnır kestesinde Oraldyń «Aqjaıyǵy» men Pavlodardyń «Ertisin» artqa tastady. Osynyń nátıjesinde 10-orynǵa kóterildi.
Osy aptanyń senbisinde, 3 qarashada elimizdiń alty qalasynda 32-týr oıyndary ótedi. Bul týrda «Astana» men «Qaırat», «Ertis» pen «Aqjaıyq», «Qyzyljar» men «Ordabasy», «Qaısar» men «Jetisý», «Shahter» men «Tobyl», «Atyraý» men «Aqtóbe» komandalary kezdesedi.
Sondaı-aq, «Astana» 8 qarashada Eýropa lıgasy toptyq kezeńindegi 4-týrda óz alańynda Chehııanyń «ıAblonets» komandasymen kezdesedi. Elordalyq klýb atalmysh komandamen 26 qazanda syrt alańda 1:1 esebimen teń oınady. Oǵan deıin «Astana» eki oıyn ótkizdi. Elordalyq «Astana» aldymen Ýkraınada «Dınamo» (Kıev) klýbymen 2:2 esebimen tarqasty. Odan keıin óz alańynda Frantsııanyń «Renn» komandasynan 2:0 esebimen basym tústi.
