QPL: «Qyzyljar» «Jeńisti» iri eseppen jeńdi

ASTANA. KAZINFORM - Búgin Qazaqstan Premer-lıgasynyń V týry ekinshi oıyn kúnindegi úsh kezdesýdiń nátıjesi belgili boldy.

Bul týrda «Qyzyljar» (Petropavl) - «Jeńis» (Astana) matchynda jankúıer kútpegen esep tirkeldi. Týrnır kestesinde komandalar qatarlas kele jatqan edi. Degenmen búgin petropavldyq klýb jeńiske jetýge bar kúshin saldy. 

Oıynnyń birinshi kezeńinde olar bir ǵana gol soqty. Ony 35-mınýtta Anatolıı Kozlenko óziniń enshisine jazdy. 

Ekinshi kezeńde Iohannes Bortalıd 60, 80, Aslan Ádil 74-mınýtta qatarynan úsh soǵyp ketti.

Sondaı-aq búgin óz alańynda kókshetaýlyq «Oqjetpes» Pavlodardyń «Ertisin» 2:1 esebimen jeńse, syrt alańda dál sondaı eseppen Jezqazǵannyń «Ulytaýy» Óskemenniń «Altaıyn» súrindirdi.

Endi bul týrdy «Aqtóbe» - «Kaspıı» (Aqtaý) kezdesýi túıindeıdi.

Aıta ketsek, 11 sáýirde «Atyraý» qyzylordalyq «Qaısardan» 2:0, Semeıdiń «Elimaıy» taldyqorǵandyq «Jetisýdy» 1:0 esebimen jeńse, «Tobyl» (Qostanaı) — «Qaırat» (Almaty), «Astana» - «Ordabasy» (Shymkent) 1:1 esebine qanaǵat bildirdi.