QPL: «Qyzyljar» «Ertisti» jeńip, 11-orynǵa kóterildi
ASTANA. KAZINFORM — Búgin fýtboldan Qazaqstan Premer-lıgasy HHVІ týryndaǵy «Ertis» (Pavlodar) — «Qyzyljar» (Petropavl) kezdesýiniń nátıjesi belgili boldy.
Eki komanda da týrnır kestesinde tómengi oryndarda keledi. Sondyqtan olar úshin búgingi oıynda úsh upaı oljalaý mańyzdy edi.
Kezdesý barysynda petropavldyq klýb sapynan Aıbol Ábiken 9-mınýtta esep ashsa, Lırıdon Latıfı 71-mınýtta penaltıden múlt ketken joq.
Osylaısha, «Qyzyljar» qarsylasynan 2:0 esebimen basym túsip, týrnır kestesinde 27 upaımen on birinshi orynǵa kóterildi.
Dál qazir «Tobyl» (Qostanaı) — «Astana», «Elimaı» (Semeı)- «Aqtóbe», «Qaırat» (Almaty) — «Jetisý» (Taldyqorǵan) ótip jatyr.
Sondaı-aq 19:00–de «Jeńis» (Astana) — «Atyraý» jasyl alańǵa shyǵady.
Al 11 qazan 15:00–de «Ulytaý» (Jezqazǵan) — «Oqjetpes» (Kókshetaý), 16:00–de «Kaspıı» (Aqtaý) — «Altaı» (Óskemen), 19:00–de «Qaısar» (Qyzylorda) — «Ordabasy» (Shymkent) oınaıdy.
Fýtboldan Qazaqstan chempıonatynyń sońǵy týry 31 qazan kúni ótkiziledi.
Eske salaıyq, fýtzaldan Qazaqstan quramasynyń 2028 jylǵy álem chempıonaty negizgi irikteý kezeńine qatysatyn quramy jarııalandy.
