QPL: «Qaısar» úzdik úshtikke endi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń tórtinshi týry máresine jetti, dep habarlaıdy QazAqparat tilshisi.
Sońǵy eki kezdesý «Qaısar» men «Jetisý», «Qyzyljar» men «Shahter» komandalary arasynda ótti.
«Qaısar» men «Jetisýdyń» deńgeıi shamalas. Jankúıerler bul kezdesýde tartysty oıyn kútti. Oıyn taǵdyryn jalǵyz gol sheshti. Ony 75-mınýtta qyzylordalyq shabýylshy Elgýdja Lobjanıdze soqty. Qyzylordalyq ujym 1:0 esebimen jeńisk ejetti.
Aıta ketelik, chempıonat bastalǵannan beri «Qaısar» jeńilistiń aşy dámin tatqan joq. Tórt kezdesýdiń úsheýinde jeńiske jetip, bireýinde teń nátıjege qanaǵat bildirdi. Nátıjesinde «Qaısar» týrnır kestesinde 10 upaımen úshinshi orynǵa kóterildi.
Taǵy bir kezdesýde «Qyzyljar» men «Shahter» sheberlik baıqasty. Oıyn barysynda qaraǵandylyq ujym sapynan 14-mınýtta Andreı Býıvolov esep ashsa, 77-mınýtta petropavldyq Gabrel Enake tarazy basyn teńestirdi. Al 85-mınýtta «Shahter» qaıtadan alǵa shyqty. Bul goldy Abdel-Azız Lamanj óziniń enshisine jazdy. «Shahter» oıynshysy Aıdos Táttibaev 90-mınýtta úshinshi gol soǵyp, qorytyndy esepti belgiledi. Qaraǵandylyq komanda 3:0 esebimen basym tústi.
Esterińizge sala ketelik, keshe, 21 tamyzda besinshi týrda eki oıyn ótkizildi. Shymkenttiń «Ordabasy» klýby Aqtaýdyń «Kaspııin» 1:0, Almatynyń «Qaıraty» Qostanaıdyń «Tobylyn» 3:1 esebimen jeńdi. Al búgin elordalyq «Astana» Kókshetaýdyń «Oqjetpesinen» 2:0 esebimen basym tústi.
Endi altynshy týr oıyndary 26 jáne 27 tamyz kúnderine belgilendi. 26 tamyzda «Taraz» ben «Oqjetpes», «Kaspıı» men «Qaısar», 27 tamyzda «Jetisý» men «Qyzyljar» komandalary kezdesedi. Osy týrdaǵy «Qaırat» pen «Astana», «Ordabasy» men «Tobyl» komandalary arasyndaǵy kezdesýler belgisiz merzimge keıinge shegerildi.
