QPL: «Qaısar» týrnır kestesinde ekinshi orynǵa kóterildi
ALMATY. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń jetinshi týry aıasynda eki oıyn ótti, dep habarlaıdy QazAqparat tilshisi.
Alǵashqy kezdesýde Qyzylordanyń «Qaısar» jáne Qostanaıdyń «Tobyl» komandalary sheberlik baıqasty. Qos komanda týrnır kestesinde aldyńǵy oryndarda keledi. Sol sebepti jankúıerler tartysty oıyn kútti.
Oıynda «Qaısar» sapynan Faıfe Rejınaldo 20-mınýtta esep ashty. Al 63-mınýtta qostanaılyq Sergeı Malyı tarazy basyn teńestirdi. Kezdesý taǵdyryn 76-mınýtta «Qaısardyń» kapıtany Ashat Taǵybergenniń alystan soqqan goly sheshti. Osylaısha, qyzylordalyq klýb qarsylasynan 2:1 esebimen basym tústi. Bul jeńisten keıin «Qaısar» týrnır kestesinde ekinshi orynǵa kóterildi.
Aıta keterligi, «Tobyl» «Qaısardy» sońǵy tórt oıynda jeńe almaı keledi. Onyń úsheýinde qyzylordalyqtar jeńiske jetse, bireýinde teń nátıje tirkeldi.
Búgingi taǵy bir kezdesý Kókshetaýdyń «Oqjetpesi» men Qaraǵandynyń «Shahter» komandalary arasynda ótkizildi. Atalǵan kezdesýde eki komanda da jeńiske jetýge bar kúshin saldy.
Oıynnyń 27-mınýtynda qaraǵandylyq klýb sapynan Gıdeon Baa esep ashty. Oǵan «Oqjetpes» oıynshysy Marko Obradovıch bir golmen jaýap qaıyrdy. Kezdesý 1:1 esebimen aıaqtaldy.
Atalǵan týrdaǵy qalǵan úsh kezdesý 30 tamyzda ótedi. Bul kúni «Ordabasy» men «Qaırat», «Astana» men «Taraz», «Qyzyljar» men «Kaspıı» komandalary kezdesedi.
