QPL: «Qaısar» óz alańynda «Atyraýdan» jeńilip qaldy
Bul kezdesý Qyzylorda qalasynda bolyp ótti. Jergilikti «Qaısar» óz alańynda «Atyraý» komandasyn qabyldady.
«Qaısar» komandasy bıyl aldyna qoıǵan mejesin oryndady. Oblys basshylyǵy olardyń aldyna keler jyly eýrokýbok oıyndaryna qatysý mindetin qoıǵan edi. Esterińizge sala ketelik, 6 qazanda elordada ótken Qazaqstan kýbogy fınalynda «Qaısar» «Atyraý» klýbyn 2:1 esebimen jeńdi. Nátıjesinde bıyl Qazaqstan kýbogynyń ıegeri atandy.
Búgingi kezdesýde «Atyraý» komandasy alǵa umtyldy. Óıtkeni, olar úshin árbir upaıdyń mańyzy artyp tur. Qazir 20 upaımen týrnır kestesinde 11 orynda keledi. Nátıjesinde olardyń qatarynan 39-mınýtta Petr Gjelchak alań ıeleri qaqpashysyn qapy qaldyryp ketti. Oıyn sońyna deıin osy esep ózgergen joq. «Qaısar» qarsylasynan 0:1 esebimen jeńilip qaldy.
Atalmysh týrdaǵy qalǵan oıyndar 26 jáne 27 qazan kúnderi ótkiziledi. 26 qazanda «Shahter» men «Oqjetpes», «Ordabasy» men «Ertis», «Qaırat» pen «Tobyl», 27 qazanda «Jetisý» men «Taraz», «Astana» men «Aqtóbe» komandalary kezdesedi.