QPL: «Qaısar» men «Jetisý» jeńiske jetti
QYZYLORDA. QazAqparat - Búgin, elimizdiń bes qalasynda fýtboldan Premer-lıga komandalary arasyndaǵy el birinshiliginiń 27-týr oıyndary ótip jatyr, dep habarlaıdy QazAqparat tilshisi.
Qazirge deıin eki qalada kezdesýler aıaqtaldy. Qyzylordanyń «Qaısary» óz alańynda Qaraǵandynyń «Shahter» komandasyn qabyldady. Atalmysh oıynda alǵashqy goldy qaraǵandylyq fýtbolshylar soqty. 30-mınýtta Egon Býh «Qaısar» qaqpasyn dál kózdeı bildi. Budan keıin alań ıeleri shabýyldarǵa shyqqanymen odan eshbir nátıje bola qoıǵan joq.
Oıynnyń ekinshi kezeńinde «Shahter» qaqpasy mańynda shabýyldar órbidi. 56-mınýtta olardyń qaqpasyna 11 metrlik aıyp doby belgilendi. Bul múmkindikti «Qaısardyń» jartylaı qorǵaýshysy Ashat Taǵybergen múlt jibergen joq. Al 80-mınýtta Bratıslav Pýnoshevats esepti eseledi. Esep 2:0. «Qaısar» jeńiske jetti.
Al «Qaırat» ekinshi oıyn qatarynan jeńildi. Bul joly syrt alańda Taldyqorǵannyń «Jetisý» klýbynan 0:1 esebimen jeńilip qaldy. Oıyn taǵdyryn sheshken jalǵyz goldy 89-mınýtta Mantas Kýklıs penaltıden soqty.
Dál qazir «Atyraý» óz alańynda Petropavldyń «Qyzyljar» komandasyn qabyldap jatyr. Al saǵat 19.00-de Shymkentte «Ordabasy» men Petropavldyń «Qyzyljar» komandalary arasyndaǵy oıyn bastaldy, saǵat 20.00-de «Aqtóbe» men Qostanaıdyń «Tobyly» jasyl alańǵa shyǵady.
