QPL: «Qaısar» men «Oqjetpes» jeńiske jetti
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń jetinshi týr oıyndary ótip jatyr, dep habarlaıdy QazAqparat tilshisi.
Qazirge deıin eki oıyn máresine jetti. Qaraǵandylyq «Shahter» elordalyq «Astana-arena» stadıonynda Qyzylordanyń «Qaısar» komandasyn qabyldady. Ázirge óz qalasyndaǵy stadıon mundaı deńgeıdegi oıyndy ótkizýge daıyn emes. Týrnır kestesinde qatar turǵan qos komanda arasyndaǵy kezdesý tartysty ótti. Oıyn barysynda qyzylordalyq jartylaı qorǵaýshy Tıgran Barsegıan «Shahter» fýtbolshylaryn aldap ótip, qarsylastar qaqpasy aldynda áriptesi Kýle Mvomboǵa pas shyǵaryp berdi. Ony Kýle Mvombo qaqpaǵa baǵyttady. Osylaısha qyzylordalyq klýb qarsylasynan 1:0 esebimen basym tústi. Aıta keterligi, «Qaısar» sońǵy bes kezdesýde úsh márte jeńip, eki márte teń tústi. Sondaı-aq, qyzylordalyq klýb ázirge óz alańynda jeńiske jetken joq.
Jetinshi týrdaǵy taǵy bir kezdesý Kókshetaý qalasynda aıaqtaldy. Jergilikti «Oqjetpes» Pavlodardyń «Ertisin» qabyldady. Kezdesýdiń 26-mınýtynda kókshetaýlyq Sanat Jumahanov mergendik tanytty. «Oqjetpes» ekinshi oıyn qatarynan jeńiske jetip otyr. Al «Ertis» úshinshi oıyn qatarynan qarsylastaryna ese jiberdi.
Búgin taǵy tórt oıyn ótkiziledi. Elorda ýaqytymen 17.00-de «Jetisý» men «Atyraý», «Ordabasy» men «Qaırat» komandalary kezdesse, 18.00-de «Aqtóbe» men «Taraz», 19.00-de «Astana» men «Tobyl» oıyndary bastalady.
Foto: www.okzhetpes.kz/
