QPL: «Qaırat» jeti oıynnan keıin jeńildi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń 17-týrynda Almatynyń «Qaıraty» óz alańynda Shymkenttiń «Ordabasy» komandasyn qabyldady, dep habarlaıdy QazAqparat tilshisi.
Eki komanda týrnır kestesinde qatarlas keledi. Búgingi kúnge deıin «Qaırat» 17 oıynnan keıin 32 upaımen úshinshi orynda tursa, «Ordabasy» 16 oıynnan keıin 30 upaımen tórttikti túıindedi.
Búgingi kezdesýde eki komanda da jeńiske jetýge talpyndy. Dese de óz degenderine jete alǵan joq. Kezdesý taǵdyryn sheshken jalǵyz gol 89-mınýtta soǵyldy. Ony «Ordabasy» sapynan Zıkı Badıbanga oryndady. Osylaısha «Ordabasy» syrt alańda 1:0 esebimen jeńiske jetti. «Qaırat» jeti oıynnan beri jeńilmeı kele jatqan edi.
Búgin atalmysh týrda taǵy bir kezdesý ótkizildi. Qostanaıda jergilikti «Tobyl» elordalyq «Astana» komandasyna 0:2 esebimen jol berdi. Týrnır kestesinde «Astana» birinshi orynǵa shyqsa, «Tobyl» ekinshi orynǵa syrǵydy. Úshinshi orynǵa «Ordabasy» kóterilip, «Qaırat» tórtinshi orynǵa tústi.
Endi «Qaırat» pen «Ordabasy» 11 shildede ÝEFA Eýropa lıgasynda oınaıdy. Sol kúni «Qaırat» syrt alańda Bosnııanyń «Shırokı Brıeg» komandasymen kezdesse, «Ordabasy» óz alańynda Grýzııanyń «Torpedo» (Kýtaısı) klýbyn qabyldaıdy.
Aıta keterligi, 17-týrdyń qalǵan oıyndary 6 shildede ótkiziledi. Bul kúni «Taraz» ben «Aqtóbe», «Qaısar» men «Shahter», «Ertis» pen «Oqjetpes», «Atyraý» men «Jetisý» komandalary kezdesedi.
Al 18-týr oıyndary 13 jáne 14 shilde kúnderi ótkiziledi. 13 shildede «Jetisý» men «Ertis», «Aqtóbe» men «Shahter», 14 shildede «Ordabasy» men «Tobyl», «Oqjetpes» pen «Taraz», «Qaırat» pen «Qaısar» oınaıdy.
