QPL: «Qaırat» týrnır kestesinde kósh basyna shyqty

ASTANA. KAZINFORM — Búgin fýtboldan Premer-lıga komandalary arasyndaǵy el birinshiliginiń HІH týrynyń birinshi oıyn kúni máresine jetti.

Bul kúni almatylyq «Qaırat» óz alańynda Jezqazǵannyń «Ulytaýyn» qabyldady. 

Ońtústik astana klýby qazir Chempıondar lıgasy úshinshi irikteý kezeńine shyqty. Sondyqtan búgingi kezdesýge negizinen jastarǵa úmit artty. Soǵan qaramastan oıyn barysynda olar shabýylǵa kóbirek kóńil bóldi. Nátıjesinde 41-mınýtta olardyń qatarynan Edmılson oıyn taǵdyryn sheshken jalǵyz goldy saldy. 

Osylaısha «Qaırat» qarsylasynan 1:0 esebimen basym túsip, týrnır kestesinde 43 upaımen birinshi orynǵa kóterildi.

Taǵy bir oıynda qostanaılyq «Tobyl» syrt alańda Petropavldyń «Qyzyljaryn» 2:0 esebimen qapy qaldyrdy.

Aıta ketsek, budan buryn «Oqjetpes» (Kókshetaý) pen «Elimaı» (Semeı) 1:1 esebine qanaǵat bildirdi.

Sondaı-aq 3 tamyzda 20:00–de «Ordabasy» (Shymkent) men «Atyraý», «Jetisý» (Taldyqorǵan) men «Turan» (Túrkistan), «Aqtóbe» men «Jeńis» (Astana) oınaıdy.

Atalǵan týrdaǵy «Astana» men «Qaısar» (Qyzylorda) kezdesýi belgisiz merzimge keıinge shegerildi. Bul sheshim elordalyq klýbtyń eýrokýbok oıyndaryna qatysýyna baılanysty qabyldanyp otyr.