QPL: «Qaırat» týrnır kestesinde birinshi orynǵa kóterildi

ASTANA. KAZINFORM — Almatylyq «Qaırat» fýtboldan Qazaqstan Premer-lıgasy altynshy týrynda Aqtaýdyń «Kaspııinen» basym tústi.

Kezdesý barysynda almatylyq komanda qarsylas qaqpasyna jyldam gol soǵý múmkindigin izdedi. Degenmen birinshi kezeńde komandalar bir-biriniń qaqpasynan sańylaý taba alǵan joq.

Ekinshi kezeńde «Qaırat» sapynan Dastan Sátpaevtyń bergen pasyn Edmılson 55-mınýtta golǵa aınaldyrsa, 85-mınýtta Jorjıno qorytyndy esepti belgiledi.

Osylaısha «Qaırat» qarsylasynan 2:0 esebimen basym tústi.

Bul jeńisten keıin almatylyq klýb týrnır kestesinde 14 upaımen birinshi orynǵa kóterildi.

Aıta ketsek, budan buryn «Elimaı» (Semeı) — «Astana» 2:2 esebine qanaǵat bildirse, pavlodarlyq «Ertis» óz alańynda Taldyqorǵannyń «Jetisýyna» 1:2 esebimen ese jiberdi.

Birinshi kezeńnen «Ordabasy» (Shymkent) — «Oqjetpes» (Kókshetaý) 0:0 esebimen teń túsip jatyr. 

Ekinshi oıyn kúni, 19 sáýirde 15:00–de «Ulytaý» (Jezqazǵan) — «Tobyl» (Qostanaı), 16:00–de «Atyraý» — «Qyzyljar» (Petropavl), 17:00–de «Jeńis» (Astana) — «Aqtóbe», 19:00–de «Qaısar» (Qyzylorda) — «Altaı» (Óskemen) sheberlik baıqasady.