QPL: «Qaırat» týrnır kestesinde birinshi orynǵa kóterildi

ASTANA. KAZINFORM - Fýtboldan Premer-lıga komandalary arasyndaǵy el birinshiligi 13-týrynyń alǵashqy eki oıynynyń nátıjesi belgili boldy.

Eki kezdesýdiń birinde almatylyq «Qaırat» óz alańynda Petropavldyń «Qyzyljaryn» qabyldady.

Oıyn barysynda almatylyq komanda jyldam gol soǵýǵa tyrysty. Alǵashqy mınýttan shabýylǵa shyqqan olar birinshi kezeńde degenine jete alǵan joq. Oıynnyń 31-mınýtynda petropavldyq klýbtan Toqtar Jańǵylyshbaı tártip buzýyna baılanysty qyzyl qaǵaz aldy. 
Ekinshi kezeńde «Qaırat» negizinen shabýylǵa kóbirek kóńil bóldi. Nátıjesinde olardyń qatarynan 74-mınýtta Valerıı Gromyko óz komandasyn alǵa shyǵardy.

Osylaısha «Qaırat» qarsylasynan 1:0 esebimen basym túsip, týrnır kestesinde birinshi orynǵa kóterildi.

Taǵy bir oıynda elordalyq «Jeńis» óz alańynda «Atyraý» komandasyn qabyldady. Kezdesý barysynda olardyń qatarynan 62- mınýtta Ivan Sharavanıa mergendik tanytsa, 92-mınýtta Ashat Baltabekov kózdegen nysanadan múlt ketken joq.

Kezdesý barysynda «Jeńis» qarsylasyn 2:0 esebimen tize búktirip, qatarynan ekinshi márte jeńiske jetti.

Endi «Elimaı» (Semeı) men «Turan» (Túrkistan), «Tobyl» (Qostanaı) men «Jetisý» (Taldyqorǵan), 20:30–da «Oqjetpes» (Kókshetaý) pen «Ordabasy» (Shymkent) sheberlik baıqasady.

Al 22 maýsymda «Qaısar» (Qyzylorda) men «Ulytaý» (Jezqazǵan), «Aqtóbe» men «Astana» jasyl alańǵa shyǵady.