QPL: «Qaırat» Taldyqorǵanda «Jetisýdan» oısyraı jeńildi
NUR-SULTAN. QazAqparat - Búgin elimizdiń alty qalasynda fýtboldan Premer-lıga komandalary arasyndaǵy el birinshiliginiń besinshi týryndaǵy taǵy eki oıyn aıaqtaldy, dep habarlaıdy QazAqparat tilshisi.
Buǵan deıin úsh oıyn nátıjesin habarlaǵan bolatynbyz. Óz alańynda Kókshetaýdyń «Oqjetpesi» Qostanaıdyń «Tobylynan» 1:2 esebimen jeńilse, Qaraǵandynyń «Shahteri» Pavlodardyń «Ertisin» 4:0, «Aqtóbe» «Atyraýdy» 2:0 esebimen tize búktirdi.
Dál qazir «Taraz» ben «Qaısar» komandalary arasyndaǵy kezdesý de máresine jetti. Atalmysh oıynda alań ıeleri alǵashqy mınýttarda basymdyq tanytty. Tipti, gol soǵatyn birneshe múmkindik boldy. Osyndaı sátterdiń birinde «Taraz» shabýylshysy Serj Nıýadzı 23-mınýtta aılasyn asyryp ketti. Oǵan 43-mınýtta «Qaısar» qorǵaýshysy Ivan Graf jaýap qaıyrdy. Ol buryshtamadan áýelep kelgen dopty «Taraz» qaqpasynyń torynda týlatty. Al 76-mınýtta «Qaısar» shabýylshysy Bratıslav Pýnoshevats áýelete kelgen dopty «Taraz» qaqpasyna soǵyp ketti.
Sondaı-aq, Taldyqorǵanda jergilikti «Jetisý» men Almatynyń «Qaıraty» arasyndaǵy kezdesýdiń de nátıjesi belgili boldy. Bıyl «Jetisý» jaqsy oıyn órnegin kórsetip keledi. Buǵan deıin talaı myqty komandamen terezesi teń deńgeıde oınaı bildi. Búgin de dál sondaı qarqynmen jergilikti jankúıerlerdi jelpindirdi. Oıynnyń 25-mınýtynda Nıkıta Naýmov buryshtamadan berilgen dopty «Qaırat» qaqpasyna soqty. Al 88-mınýtta «Jetisý» sapynan Oleg Hromtsov mergendik tanytty. Al oıyn sońyna taman alań ıeleri qatarynan Kamo Oganesıan qaqpany dál kózdedi. Taldyqorǵandyq klýb osylaısha «Qaıratty» 3:0 esebimen jeńdi. «Qaırat» bıylǵy dop dodasynda alǵash ret qarsylasyna ese jiberip otyr. Bes týr boıy birde-bir upaı shashaý shyǵarmaǵan «Tobyl» komandasynyń ǵana eńsesi bıik.
Besinshi týr «Astana» men «Ordabasy» komandalary arasyndaǵy kezdesýmen máresine jetedi. Ol elorda ýaqytymen 18.00-de bastaldy.
Foto: fckairat.com
