QPL: «Qaırat» pen «Ordabasy» syrt alańda upaı joǵaltty
ASTANA. KAZINFORM - Fýtboldan Qazaqstan Premer-lıgasynyń ІH týrynyń ekinshi oıyn kúninde taǵy eki kezdesýdiń nátıjesi belgili boldy.
Aldymen «Ulytaý» (Jezqazǵan) men «Qaırat» (Almaty) komandalary jasyl alańǵa shyqty.
Jezqazǵandyq komanda bıyl birinshilikti sátti bastady. Nátıjesinde týrnır kestesinde aldyńǵy oryndarda keledi. Al ótken jyly el chempıony atanǵan almatylyq komanda bıyl sol jetistigin qaıtalaýǵa tyrysyp-aq júr.
Match barysynda «Qaırat» sapynan Dastan Sátpaev 33-mınýtta esep ashsa, oǵan 83-mınýtta «Ulytaý» sapynan Maksım Chalkın bir golmen jaýap qaıyrdy.
Osylaısha qos komanda bul kezdesýde 1:1 esebine qanaǵat bildirdi.
Aıta ketsek, budan buryn jezqazǵandyq klýb óz alańyndaǵy barlyq kezdesýde qarsylastaryna ese jibergen joq. Olar petropavldyq «Qyzyljardy» 1:0, qostanaılyq «Qyzyljardy» 2:1, semeılik «Elimaıdy» 1:0 esebimen jeńse, «Aqtóbemen» 1:1 esebimen teń tústi.
Óskemende «Altaı» men «Ordabasy» arasyndaǵy oıyn ótti. Týrnır kestesinde óskemendik klýb sońǵy orynda tursa, shymkenttik komanda ázirge ekinshi orynǵa jaıǵasqan. Soǵan qaramastan oıyn barysynda qarsylastar bir-biriniń qaqpasynan sańylaý taba alǵan joq. Súreńsiz ótken oıynda 0:0 esebi tirkeldi.
Aıta keteıiik, dál qazir «Aqtóbe» - «Qaısar» arasyndaǵy kezdesý ótip jatyr.
Buǵan deıin 9 mamyrda elordalyq «Astana» Petropavldyń «Qyzyljaryn» 2:1 esebimen jeńse, qostanaılyq «Tobyl» Pavlodardyń «Ertisin» 1:0 esebimen qapy qaldyrdy.
Al taldyqorǵandyq «Jetisý» Astananyń «Jeńisine» 2:3, semeılik «Elimaı» Aqtaýdyń «Kaspııine» 0:1 esebimen ese jiberse, taǵy bir kezdesýde «Oqjetpes» (Kókshetaý) - «Atyraý» klýbtary 0:0 esebine qanaǵat bildirdi.
