QPL: «Qaırat» pen «Astananyń» qashan kezdesetini belgili boldy

NUR-SULTAN. QazAqparat - Qazaqstan kásipqoı fýtbol lıgasy birinshi aınalymnyń qalǵan týrlarynyń kúntizbesin jarııalady, dep habarlaıdy QazAqparat tilshisi lıga saıtyna silteme jasap.

Segizinshi týr oıyndary 11 jáne 12 qyrkúıek kúnderi ótkiziledi. 11 qyrkúıekte «Jetisý» men «Oqjetpes», «Shahter» men «Taraz», 12 qyrkúıekte «Ordabasy» men «Astana», «Tobyl» men «Qyzyljar», «Qaırat» pen «Qaısar» komandalary kezdesedi.

Birinshi aınalymnyń sońǵy týry 2 qazanǵa belgilengen. Al 4 qazanda «Qaırat» pen «Astana» keıinge qaldyrylǵan 6-týr oıynyn ótkizedi.

Qazaqstandyq komandalardyń eýrokýbok oıyndaryna qatysýyna baılanysty oıyn kúntizbesinde birqatar ózgerister bolýy múmkin.

Esterińizge sala ketelik, «Astana», «Qaırat» jáne «Qaısar» komandalary 17 qyrkúıekte Eýropa lıgasy ekinshi irikteý satysynda óz qarsylastarymen sheberlik baıqasady .

Qazirge deıin barlyǵy 7 týr oıyndary ótti. Kósh basynda kele jatqan «Qaırattyń» 18 upaıy bar. Odan keıingi oryndardaǵy «Qaısar» 13, «Astana» 11 upaı enshilegen.