QPL: «Qaırat» pen «Astana» arasyn úsh upaı ǵana bólip tur
ASTANA. QazAqparat - Búgin, 12 tamyzda fýtboldan Premer-lıga komandalary arasyndaǵy el birinshiliginiń ekinshi aınalymy máresine jetip, elimizdiń úsh qalasynda 22-týr oıyndary ótti, dep habarlaıdy QazAqparat tilshisi.
Alǵashqy oıyn Petropavl qalasynda boldy. Munda jergilikti «Qyzyljar» Almatynyń «Qaırat» komandasyn qabyldady. Bul kezdesýde qonaqtar basymdyq kórsetti. Ońtústik astana fýtbolshylary qatarynan Aderınsola Eseola 15-mınýtta esep ashqan edi. «Qyzyljar» sapynan Shota Grıgalashvılı 17-mınýtta penaltı soǵyp, tarazy basyn teńestirdi. Birinshi kezeń dál osy eseppen aıaqtaldy. «Qaırat» ekinshi kezeńde taǵy eki gol soǵyp, ózderine qajetti úsh upaıdy oljalap ketti. Esep 3:1. «Qaırat» bıylǵy birinshiliktegi 16-jeńisine jetti. Nátıjesinde týrnır kestesinde «Astanaǵa» upaı sany jóninen jaqyndaı tústi. Qazir «Astana» men «Qaırat» arasyn nebári úsh upaı ǵana bólip tur.
Atyraý qalasynda jergilikti «Atyraý» týrnır kestesinde qatarlas turǵan «Ertisti» qabyldady. Bıyl qos klýb ta jankúıer seniminen shyǵa almaı keledi. «Atyraý» búgingi kúnge deıin kósh sońynda júrgen edi. Bilikti bapker Vıktor Kýmykov tizgindi ustaǵaly beri jeńiske jetý jolyn izdep keledi. Osynyń nátıjesinde 38-mınýtta Marat Haırýllın penaltıden esep ashsa, ekinshi kezeń bastala salysymen, 46-mınýtta Adenıdje Babatýnde esepti ústemeleı tústi. Esep 2:0. «Atyraý» osylaısha sońǵy tórt týrdyń úsheýinde jeńiske jetip otyr. Olar týrnır kestesinde eń sońǵy orynnan toǵyzynshy orynǵa kóterildi.
Qaraǵandyda «Shahter» men Shymkenttiń «Ordabasy» klýby arasyndaǵy kezdesýde esep ashylǵan joq. Kenshiler ústimizdegi jyly jınaqy oıynymen kózge túse almaı keledi. Týrnır kestesinde 11-orynda turýy sonyń aıqyn dáleli. Aldyńǵy oryndarda kele jatqanymen «Ordabasy» da ala-qula oıynymen oınap júr. Búgingi oıyn 0:0 esebimen teń aıaqtaldy.
Sondaı-aq, dál osy týrda keshe, 11 tamyzda óz alańynda «Aqtóbe» «Qaısardan» 3:1, «Tobyl» «Jetisýdan» 1:0 esebimen basym tústi. «Aqjaıyq» pen «Astana» arasyndaǵy kezdesý 23 mamyrda ótkizilip, onda oraldyqtar 3:0 esebimen jeńiske jetken edi.
