QPL: «Qaırat» pen «Aqtóbe» qarsylastarymen teń tústi
ASTANA. KAZINFORM — Qazaqstan Premer-lıgasy HІ týrynda almatylyq «Qaırat» pen «Aqtóbe» óz alańynda qarsylastarymen teń tústi.
Bul týrdyń ekinshi oıyn kúni, 23 mamyrǵa belgilengen kezdesýdiń birinde «Qaırat» (Almaty) — «Qaısar» (Qyzylorda) komandalary jasyl alańǵa shyqty.
Jankúıerler kósh basynda kele jatqan almatylyq klýb bul joly da jeńisti jolyn jalǵastyryp, kezekti úsh upaıyn enshileıdi dep josparlaǵan edi. Degenmen kezdesý barysynda qyzylordalyq klýb tájirıbeli qarsylasymen terezesi teń oıyn kórsetti.
«Qaırat» match barysynda shabýylǵa kóbirek kóńil bóldi. Oǵan qyzylordalyq fýtbolshylar laıyqty toıtarys bere bildi.
Osylaısha komandalar 0:0 esebine qanaǵat bildirip tarasty.
Dál osyndaı esep «Aqtóbe» — «Qyzyljar» (Petropavl) kezdesýinde tirkeldi.
Aıta ketsek, budan buryn semeılik «Elimaı» óz alańynda elordalyq «Jeńisti» 2:1 esebimen súrindirse, «Jetisý» (Taldyqorǵan) men «Atyraý» 0:0 esebine qanaǵat bildirdi.
Dál qazir «Tobyl» (Qostanaı) — «Ordabasy» (Shymkent) kezdesýi ótip jatyr.
Aıta ketsek, 22 mamyrda ótken oıyndarda elordalyq «Astana» Jezqazǵannyń «Ulytaýyn» 3:0, Kókshetaýdyń «Oqjetpesi» Óskemenniń «Altaıyn» 1:0 esebimen jeńse, «Kaspıı» (Aqtaý) — «Ertis» (Pavlodar) 2:2 esebine qanaǵat bildirdi.
