QPL: «Qaırat» óz alańynda «Tobyldan» oısyraı jeńildi
ASTANA. KAZINFORM - Fýtboldan Qazaqstan Premer-lıgasynda HHVІ týryndaǵy «Qaırat» (Almaty) - «Tobyl» (Qostanaı) kezdesýiniń nátıjesi belgili boldy.
Bıyl bas júldege qol jetkizýdi aldyna maqsat etken almatylyq klýb bul kezdesýde de úsh upaı oljalaýdy josparlaǵan edi. Degenmen oıyn barysynda qostanaılyq komanda belsendi qımyl kórsetti. Alań ıeleri qaqpasyna jıi shabýyldap, gol soǵatyn múmkindikti izdedi. Osyndaı sátterdiń birinde «Qaırat» qaqpasyna penaltı belgilendi. Ony 18-mınýtta «Tobyl» sapynan Ýrosh Mılovanovıch óziniń enshisine jazdy. Oǵan 40-mınýtta «Qaırat» fýtbolshy Mark Gýal bir golmen jaýap qaıyrdy.
Oıynnyń 44-mınýtynda Ýrosh Mılovanovıch taǵy bir márte kózge tústi. Odan keıin qostanaılyq klýbtan Vıtalıı Lısakovıch 63, Lýıs Gerra 80-mınýtta kózdegen nysanadan múlt ketken joq.
Osylaısha «Tobyl» tájirıbeli qarsylasyn 4:1 esebimen jeńip, týrnır kestesinde 34 upaımen jetinshi orynǵa taban tiredi.
Aıta ketsek, búgin pavlodarlyq «Ertis» óz alańynda Kókshetaýdyń «Oqjetpesin» 2:1, Óskemenniń «Altaıy» syrt alańda Jezqazǵannyń «Ulytaýyn» 3:0 esebimen súrindirdi.
Keshe, ıaǵnı 12 qyrkúıekte bul týrdyń bes oıyny ótti. Aldymen óz alańynda Aqtaýdyń «Kaspııi» «Aqtóbeden» 1:2 esebimen jeńilse, odan keıin Semeıdiń «Elimaıy» Taldyqorǵannyń «Jetisýyn» 2:1, astanalyq «Jeńis» Petropavldyń «Qyzyljaryn» 3:1, shymkenttik «Ordabasy» «Astanany», qyzylordalyq «Qaısar» «Atyraýdy» 1:0 esebimen jeńdi.
Endi komandalar aldaǵy týr oıyndaryn 17 jáne 18 qyrkúıek kúnderi ótkizedi. Aldymen 17 qyrkúıekte «Tobyl» - «Elimaı», «Astana» - «Qaırat», «Atyraý» - «Ordabasy» oınasa, 18 qyrkúıekte «Oqjetpes» - «Jeńis», «Jetisý» - «Kaspıı», «Altaı» - «Ertis», «Qyzyljar» - «Qaısar», «Aqtóbe» - «Ulytaý» kezdesedi.
