QPL: «Qaırat» qatarynan úshinshi márte jeńildi

Onynshy týr oıyndary 11 jáne 12 mamyr kúnderi ótkizildi. Búgin Nur-Sultan qalasynda Qaraǵandynyń «Shahteri» Taldyqorǵannyń «Jetisý» komandasyn 2:0 esebimen jeńdi. Keshe óz alańynda «Taraz» elordalyq «Astanadan» dál osy eseppen basym tússe, Pavlodarda dál sol eseppen «Ordabasy» jergilikti «Ertisti» tize búktirdi.

Búgingi Qyzylordada jergilikti «Qaısar» Qostanaıdyń «Tobylyn» 5:1 esebimen oısyrata jeńdi. Alań ıeleri birinshi kezeńde úsh gol saldy. Aldymen 8-mınýtta Tıgran Barsegıan qarsylastar qaqpasynan sańylaý tapty. Al 38-mınýtta Kýle Mvombo, 44-mınýtta Ashat Taǵybergen mergendik tanytty. Ekinshi kezeń bastala salysymen «Tobyl» sapynan Nıkı Kvekveskırı esep aıyrmasyn qysqartty. Degenmen «Qaısar» kezdesý sońyna taman taǵy eki gol soqty. Tıgran Barsegıan 85-mınýtta atalmysh kezdesýde qaqpany ekinshi márte dál kózdese, qyzylordalyq jas shabýylshy Shoqan Abzalov 90-mınýtta óziniń Premer-lıgadaǵy alǵashqy golyn saldy. Osylaısha «Qaısar» «Tobyldy» 5:1 esebimen oısyrata jeńdi.

«Aqtóbe» óz alańynda Kókshetaýdyń «Oqjetpesinen» 0:2 esebimen jeńildi. Aqtóbelikter qatarynan 32-mınýtta Jambyl Kókeev óz qaqpasyna gol soǵyp alsa, 54-mınýtta kókshetaýlyq Artem Dmıtrıev qorytyndy esepti belgiledi.

Almatynyń «Qaıraty» taǵy da qarsyasyna ese jiberdi. Bul joly Nur-Sultan qalasynda «Atyraýǵa» 1:2 esebimen jol berdi. «Atyraý» sapynan 34-mınýtta Darko Bedov esep ashsa, 36-mınýtta «Qaırattan» Aderınsola Eseola tarazy basyn teńestirdi. Qorytyndy esep 69-mınýtta atyraýlyq Rızvan Ablıtarov belgiledi. Osylaısha «Qaırat» bıylǵy birinshilikte besinshi márte jeńildi. Sondaı-aq, qatarynan úshinshi ret qarsylastaryna ese jiberip otyr.

Endi 11-týr oıyndary 18 jáne 19 mamyr kúnderi ótkiziledi. 18 mamyrda «Oqjetpes» pen «Qaısar», «Jetisý» men «Aqtóbe» kezdesse, 19 mamyrda «Tobyl» men «Atyraý», «Ordabasy» men «Taraz», «Qaırat» pen «Ertis», «Astana» men «Shahter» sheberlik baıqasady.