QPL: «Qaırat» qatarynan ekinshi márte jeńildi

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń 10-týrynyń alǵashqy oıyn kúni ótti.

Atalǵan týrdy Almatyda jergilikti «Qaırat» (Almaty) pen «Oqjetpes» (Kókshetaý) komandalary bastady. 

Kezdesý barysynda kókshetaýlyq klýb alǵashqy bolyp esep ashty. Aldymen 11-mınýtta Dáýren Jumat penaltıden esep ashsa, Strahınııa Iovanovıch 52- mınýtta esepiti ústemeleı tústi.

Oǵan «Qaırat» sapynan Dastan Sátpaev 56-mınýtta jalǵyz golmen jaýap qaıyrdy. Bul - jas fýtbolshynyń bıylǵy birinshiliktegi jetinshi goly.

Osylaısha «Qaırat» qarsylasyna 1:2 esebimen ese jiberdi. Saldarynan qatarynan ekinshi kezdesýde jeńistiń aşy dámin tatty.

Taǵy bir kezdesýde «Astana» men «Jeńis» (Astana) komandalary sheberlik baıqasty. Kezdesý barysynda «Astana» sapynan Branımır Kalaıtsa 14, Abzal Beısebekov 76, Ramazan Kárimov 88, Elhan Astanov 90-mınýtta mergendik tanytsa, «Jeńis» qatyran Zýrab Tevzadze 4, Adılıo 31-mınýtta gol soqty.

Kezdesý 4:2 esebimen «Astananyń» basymdyǵymen aıaqtaldy. 

Sondaı- aq Shymkentte «Ordabasy» Jezqazǵannyń «Ulytaý» komandasyna 0:1 esebimen ese jiberdi. Oıynnyń 45-mınýtyna Jasulan Moldaqaraevtyń penaltıden soqqan goly jezqazǵandyq klýbqa bıylǵy birinshiliktegi alǵashqy jeńisti alyp keldi.

Al 25 mamyrda «Jetisý» (Taldyqorǵan) men «Aqtóbe», «Qyzyljar» (Petropavl) men «Elimaı» (Semeı), «Atyraý» men «Qaısar» (Qyzylorda), «Turan» (Túrkistan) men «Tobyl» (Qostanaı) oınaıdy.