QPL: «Qaırat» «Astanany» iri eseppen jeńdi
ASTANA. KAZINFORM - Qazaqstan Premer-lıgasynda IV týrynda almatylyq «Qaırat» elordalyq «Astanadan» basym tústi.
Bıylǵy birinshilikti eki komanda da qarqyndy bastaǵan edi. Alǵashqy úsh týrda eki márte jeńiske jetip, bireýinde teń tústi. Nátıjesinde 7 upaımen týrnır kestesinde úzdik úshtikten kórindi.
Jyl saıyn aldyńǵy oryndardan kórinip júrgen komandalar kezdesýine jankúıerler tarapynan qyzyǵýshylyq erekshe. Dese de bıyl elordalyq klýb sapynan birqatar fýtbolshy ketip qaldy. Esesine almatylyq komanda qataryna tájirıbeli fýtbolshylardy qosa aldy.
Kezdesý barysynda alǵashqy mınýttan qos komanda shabýylǵa kóńil bóldi. Osynyń nátıjesinde almatylyq klýb jyldam gol soǵyp úlgerdi. Olardyń qatarynan 10-mınýtta Jorjıno esep ashsa, 22-mınýtta Dastan Sátpaev esepti ústemeleı tústi. Oıynnyń 41-mınýtynda Jorjıno taǵy bir márte mergendigimen kózge tússe, 45-mınýtta Aleksandr Martynovıch óz múmkindigin múlt jibergen joq. Osylaısha almatylyq klýb qarsylasynan 4:0 esebimen basym tústi.
Endi «Astana» 11 sáýirde óz alańynda «Ordabasymen» kezdesse, sol kúni «Qaırat» syrt alańda qostanaılyq «Tobylmen» jasyl alańǵa shyǵady.
Dál qazir «Jeńis» (Astana) - «Oqjetpes» (Kókshetaý) kezdesýiniń birinshi kezeńi aıaqtaldy. Ázirge elordalyq klýb qarsylasynan 1:0 esebimen jeńip jatyr.
Aıta ketsek, bul týrda 4 sáýirde Pavlodardyń «Ertisi» óskemendik «Altaıdan» 1:0, Semeıdiń «Elimaıy» qostanaılyq «Tobyldan» 1:0 esebimen basym tústi.
Sondaı-aq «Qaısar» (Qyzylorda) men «Qyzyljar» (Petropavl) 0:0, «Ordabasy» (Shymkent) men «Atyraý» 1:1 esebine qanaǵat bildirgen edi.
Sonymen qatar búgin «Ulytaý» (Jezqazǵan) men «Aqtóbe» 1:1 esebimen teń oınasa, aqtaýlyq «Kaspıı» Taldyqorǵannyń «Jetisýyna» 0:1 esebimen ese jiberdi.