QPL: «Qaırat» «Astanadan» jeti upaıǵa uzap ketti
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń jetinshi týry máresine jetti, dep habarlaıdy QazAqparat tilshisi.
Búgingi alǵashqy kezdesýde Shymkenttiń «Ordabasy» jáne Almatynyń «Qaırat» komandalary sheberlik baıqasty. Bul kezdesýde almatylyq klýb sapynan brazılııalyq shabýylshy Vagner Lav 17-inshi jáne 22-mınýtta qos goldyń avtory atandy. Oǵan shymkenttik fýtbolshy Joao Paolo 34-mınýtta bir golmen jaýap qaıyrdy. Al 40-mınýtta «Qaırattyń» shabýylshysy Abat Aıymbetov mergendik tanytyp, oıynnyń núktesin qoıdy. Osylaısha «Qaırat» qarsylasynan 3:1 esebimen basym tústi.
Elordalyq «Astana» eki týr boıy jeńiske jete almaı keledi. Ótken týrda «Tobyldan» 0:2 esebimen jeńilgen olar bul joly «Tarazben» 1:1 esebimen teń tarqasty. Oıynda elordalyq klýbtan Tıgran Barsegıan 4-mınýtta gol soqsa, oǵan tarazdyq Tonı Sılva 48-mınýtta bir golmen jaýap berdi.
Jetinshi týrdan keıin týrnır kestesinde «Qaırat» 18 upaımen kósh basynda tur. Al «Astananyń» enshisinde nebári 11 upaı bar. Osylaısha almatylyq klýb basty qarsylasynan 7 upaıǵa uzap ketti.
Sondaı-aq búgin Petropavldyń «Qyzyljary» Aqtaýdyń «Kaspııimen» kezdesýde 1:0 esebimen jeńiske jetti. Ony 6-mınýtta petropaldyq fýtbolshy Maksım Drachenko óziniń enshisine jazdy.
Atalǵan týrdaǵy eki oıyn keshe ótkizildi. Bul kúni «Qaısar» «Tobyldan» 1:0 esebimen basym tússe, «Oqjetpes» pen «Shahter» 1:1 esebimen teń oınady https://kaz.inform.kz/news/kpl-kaysar-turnir-kestesinde-ekinshi-orynga-koterildi_a3688798.
Endi Qazaqstan chempıonatynda azdaǵan úzilis jarııalandy. Sebebi, Qazaqstan quramasy qyrkúıek aıynyń alǵashqy kúnderinde Ulttar lıgasynda eki oıyn ótkizedi.
Segizinshi týr 12 qyrkúıekte ótkiziledi.
