QPL: «Qaırat» «Aqtóbeni» oısyrata jeńdi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń 29-týrynyń úsh oıyny ótkizildi, dep habarlaıdy QazAqparat tilshisi.
Alǵashqy oıyn Kókshetaý qalasynda bolyp ótti. Jergilikti «Oqjetpes» týrnır kestesinde sońǵy oryndardyń birinde kele jatqan «Taraz» komandasyn qabyldady. Oıynnyń 20-mınýtynda «Oqjetpestiń» jartylaı qorǵaýshysy Mılan Stoıanovıch esep ashty. Odan keıin kókshetaýlyq komanda sapynan Danılo Almeıda Alves 28-mınýtynda esepti ústemeleı tústi. Odan keıin «Taraz» komandasynan Álisher Súleı 43, Elgýdja Lobjanıdze 66 jáne 90-mınýttarda eki gol soǵyp ketti. Nátıjesinde «Taraz» syrt alańda qarsylasynan 3:2 esebimen basym tústi.
Taldyqorǵannyń «Jetisýy» óz alańynda Pavlodardyń «Ertisin» 2:1 esebimen tize búktirdi. Oıynyń 9-mınýtynda pavlodarlyq Rýslan Esimov esep ashqan edi. Odan keıin alań ıeleri qatarynan Aslan Darabaev 55, Martın Toshev 88-mınýtta bir-bir goldyń avtory atandy.
Týrnır kestesinde kósh basynda kele jatqan Almatynyń «Qaıraty» eń sońǵy oryndaǵy «Aqtóbe» komandasyn 6:0 eebimen oısyrata jeńdi. Esepti 4-mınýtta almatylyq Konrad Vrjeşınskıı ashty. Odan keıin Marton Eppel 6-mınýtta mergendik tanytsa, 54-mınýtta Ǵafýrjan Súıimbaev aqtóbelik qaqpashyny qapy qaldyrdy. Al 58-mınýtta almatylyq taǵy bir oıynshy Aderınsola Eseola esepti ulǵaıta tústi. Al 60-mınýtta Baýyrjan Islamhan penaltıdi múltiksiz oryndady, 68-mınýtta Marton Eppel taǵy bir márte qanjyǵasyn maılady. Osylaısha «Qaırat» «Aqtóbeni» oısyrata jeńdi.
Endi 6 qazanda «Ordabasy» men «Astana» komandalary kezdesedi. Bul týrdaǵy «Qaısar» men «Tobyl», «Shahter» men «Atyraý» arasyndaǵy kezdesý 30 qazanǵa aýystyryldy. Óıtkeni, 6 qazan kúni Qazaqstan kýbogynyń fınalynda «Qaısar» men «Atyraý» komandalary sheberlik baıqasady.
