QPL: «Elimaı» týrnır kestesinde kósh basyna shyqty

ASTANA. KAZINFORM – Búgin Qazaqstan Premer-lıgasynyń V týryndaǵy eki oıynnyń nátıjesi belgili boldy.

Bul týrdaǵy alǵashqy kezdesý «Atyraý» men «Qaısar» (Qyzylorda) arasynda ótti. Eki komanda tórt týrdan keıin jeńiske jete almaı júrgen edi. Sondyqtan olar úsh upaıǵa qol jetkizýge bar kúshin saldy.

Birinshi kezeńde qyzylordalyq klýbtyń basymdyǵy baıqalyp turdy. Degenmen olar dittegen maqsatyna jete alǵan joq. Ekinshi kezeńde «Atyraý» óz múmkindikterin qur jibermedi. Aldymen 72-mınýtta Egor Hvalko esep ashsa, 94-mınýtta Qýanysh Qalmuratov oıynnyń núktesin qoıdy.
Osylaısha «Atyraý» qarsylasynan 2:0 esebimen basym túsip, bıylǵy dop dodasyndaǵy alǵashqy úsh upaıyna qol jetkizdi.

Sondaı-aq «Jetisý» (Taldyqorǵan) men «Elimaı» (Semeı) kezdesýi de aıaqtaldy. Bul oıynda Roman Murtazaevtyń 85-mınýtta penaltıden soqqan jalǵyz goly match taǵdyryn sheshti.
Oıynda 1:0 esebimen basym túsken semeılik klýb 11 upaımen týrnır kestesinde kósh basyna shyqty.

Endi búgin 18:00-de «Tobyl» (Qostanaı) men «Qaırat» (Almaty), 20:00-de «Astana» men «Ordabasy» (Shymkent) jasyl alańǵa shyǵady. 

Sondaı-aq 12 sáýirde «Oqjetpes» (Kókshetaý) - «Ertis» (Pavlodar), «Altaı» (Óskemen) - «Ulytaý» (Jezqazǵan), «Qyzyljar» (Petropavl) - «Jeńis» (Astana), «Aqtóbe» - «Kaspıı» (Aqtaý) oınaıdy.

Buǵan deıin Qazaqstan Premer-lıgasynyń besinshi týr oıyndary bastalatynyn habarlaǵanbyz.