QPL: «Elimaı» men «Astana» teń tarqasty

ASTANA. KAZINFORM – Fýtboldan Qazaqstan Premer-lıgasynyń VI týryndaǵy eki oıynnyń nátıjesi belgili boldy.

Bul týrda jankúıerler «Elimaı» (Semeı) men «Astana» kezdesýine erekshe qyzyǵýshylyq bildirdi. Oıyn bastala sala elordalyq komandadan Marın Tomasov nebári 18-sekýndta gol soqty. Osylaısha ol el birinshiligi tarıhynda jyldam gol soǵý jóninen ol alǵashqy úshtikke endi.

Bul jóninen rekord ázirge qazaqstandyq shabýylshy Jasulan Moldaqaraevtyń enshisine jazylǵan. Shabýylshy 2017 jyldyń 22 qazanynda qostanaılyq «Tobyl» sapynda Kókshetaýdyń «Oqjetpes» komandasyna nebári 10-sekýndta gol soqqan edi. Sondaı-aq 2015 jyly «Ordabasy» sapynan Aleksandr Geınrıh, 2017 jyly «Okjetpes» fýtbolshysy Sergeı Shaff 18 sekýndta gol soqqan.

Degenmen 5-mınýtta «Elimaı» fýtbolshysy Ádilbek Jumahanov tarazy basyn teńestirse, Fessý Plakka 27-mınýtta penaltıden múlt ketken joq. Oıynnyń 47-mınýtynda «Astananyń» jas fýtbolshysy Maqsat Abraev qaqpany alystan dál kózdedi. Kezdesýdiń qalǵan ýaqytynda tablodaǵy esepke ózgeris engen joq. Komandalar 2:2 esebine qanaǵat bildirdi.

Qazirge deıin ótken taǵy bir kezdesýde pavlodarlyq «Ertis» óz alańynda Taldyqorǵannyń «Jetisýyna» 1:2 esebimen ese jiberdi.

Dál qazir «Qaırat» (Almaty) pen «Kaspıı» (Aqtaý), «Ordabasy» (Shymkent) men «Oqjetpes» (Kókshetaý) arasyndaǵy oıynda ótip jatyr.

Ekinshi oıyn kúni, 19 sáýirde 15:00-de «Ulytaý» (Jezqazǵan) - «Tobyl» (Qostanaı), 16:00-de «Atyraý» - «Qyzyljar» (Petropavl), 17:00-de «Jeńis» (Astana) - «Aqtóbe»,19:00-de «Qaısar» (Qyzylorda) - «Altaı» (Óskemen) sheberlik baıqasady. 

Buǵan deıin búgin Qazaqstan Premer-lıgasynyń VI týr oıyndary bastalatynyn jazǵan edik.