QPL: «Elimaı» komandasy «Ulytaýdan» iri eseppen basym tústi

ASTANA. KAZINFORM - Fýtboldan Premer-lıga komandalary arasyndaǵy Qazaqstan chempıonatynyń tórtinshi týry máresine jetti.

Atalǵan týrdy semeılik «Elimaı» men jezqazǵandyq «Ulytaý» komandalary túıindedi.

Kezdesý barysynda semeılik klýb oıyn tizginin birden qolǵa alýǵa tyrysty. Degenmen oǵan ulytaýlyq komanda toıtarys berdi. Dese de 44-mınýtta «Elimaı» sapynan Fessý Plakka mergendigimen kózge tústi.

Ekinshi kezeńde olardyń qatarynan Feısala Mýlıch 74, Ádilbek Jumahanov 93-mınýtta basymdyqty arttyra tústi. Osylaısha semeılik klýb qarsylasynan 3:0 esebimen basym tústi.

Atalǵan jeńisten keıin «Elimaı» 7 upaımen besinshi orynǵa kóterilse, «Ulytaý» nebári eki upaımen kósh sońynda qalyp qoıdy.

Atalǵan týrda 5 sáýirde «Astana» komandasy «Ordabasyny» 2:1, «Turan» «Qyzyljardy» 3:2, «Tobyl» «Oqjetpesti» 1:0 esebimen tize búktirse, taldyqorǵandyq «Jetisý» men astanalyq «Jeńis» 0:0 esebine qanaǵat bildirdi.

Búgin «Qaırat» komandasy «Atyraýdy», «Aqtóbe» fýtbol klýby «Qaısardy» 4:1 esebimen tize búktirdi.