QPL: Dastan Sátpaevtyń eki goly «Qaıratqa» jeńis alyp keldi

ASTANA. KAZINFORM - Fýtboldan Premer-lıga komandalary arasyndaǵy Qazaqstan chempıonatynyń jetinshi týryndaǵy alǵashqy eki oıynnyń nátıjesi belgili boldy.

Týrnır kestesinde kósh basynda kele jatqan almatylyq «Qaırat» syrt alańda Jezqazǵannyń «Ulytaý» klýbymen kezdesti.

Jankúıerler kókeıinde sońǵy oryndy mise tutyp turǵan jezqazǵandyq komanda tájirıbeli qarsylasyna tótep bere ala ma degen saýal turdy. Bıyl bas júldege qol sozýdy qalaıtyn «Qaırat» upaıdan shashaý shyǵarǵysy kelgen joq. Alǵashqy mınýttan negizgi quram fýtbolshylaryna senim artty.

Birinshi kezeńde olar shabýylǵa kóbirek kóńil bóldi. Soǵan qaramastan bir ǵana gol soqty. Oıynnyń 30-mınýtynda 16 jastaǵy jas fýtbolshy Dastan Sátpaev bıylǵy birinshiliktegi besinshi goldy enshisine jazdy. Al 48-mınýtta almatylyq klýbtan Aleksandr Martynovıch esepti ústemeleı tússe, odan keıin Georgı Zarıa 62-mınýtta penaltıden múlt ketken joq.

Almatylyq komandadan Dastan Sátpaev 68-mınýtta taǵy bir márte mergendik tanytty. Onyń soqqany goly altaýǵa jetip, «Astananyń» jartylaı qorǵaýshysy Marın Tomasovpen teńesti.
Oǵan «Ulytaý» sapynan Maksım Chalkın 79-mınýtta bir golmen jaýap qaıyrdy. Osylaısha «Qaırat» qarsylasynan 4:1 esebimen basym túsip, týrnır kestesinde 17 upaımen jeke-dara kósh bastady.

Atalǵan týrdaǵy taǵy bir kezdesýdiń nátıjesi belgili boldy. Elordalyq «Jeńis» óz alańynda «Aqtóbege» 0:1 esebimen jol berdi. 

Dál qazir «Atyraý» óz alańynda birinshi kezeńnen keıin shymkenttik «Ordabasyǵa» 0:2 esebimen jeńilip jatyr. 

Búgin saǵat 19.00-de «Turan» (Túrkistan) men «Jetisý» (Taldyqorǵan) kezdesedi.

Sondaı-aq erteń, 4 mamyrda «Qaısar» (Qyzylorda) men «Astana», «Elimaı» (Semeı) men «Oqjetpes» (Kókshetaý), «Tobyl» (Qostanaı) men «Qyzyljar» (Petropavl) sheberlik baıqasady.

Buǵan deıin fýtboldan Premer-lıga komandalary arasyndaǵy Qazaqstan chempıonatynyń jetinshi týry bastalatynyn jazǵan edik.