QPL: Dastan Sátpaev maýsymdaǵy segizinshi golyn salyp, «Qaıratqa» jeńis syılady

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń 11-týrynda almatylyq «Qaırat» komandasy «Aqtóbeden» basym tústi.

Eki klýb týrnır kestesinde qatarlas keledi. Dese de keıingi eki týrda almatylyq komanda qatarynan eki márte jeńilistiń aşy dámin tatyp, týrnır kestesindegi jaǵdaıyn qıyndatyp alǵan edi. Sondyqtan búgin olar úshin jeńis aýadaı qajet.

Oıynnyń birinshi kezeńinde tizgin almatylyq klýbta boldy. Soǵan qaramastan qonaqtar gol soǵa alǵan joq. Ekinshi kezeńde «Aqtóbe» sapynan Aıan Baıdáýletov 50-mınýtta esep ashyp ketti. Odan keıin 70-mınýtta Dastan Sátpaev qaqpany dál kózdegen edi. Degenmen tóreshi oǵan deıin «Qaırattyń» jartylaı qorǵaýshysy Valerıı Gromyko qarsylasyn qolmen uryp qulatty degen jeleýmen ony alańnan qýdy. Goldy esepke alǵan joq.

Bir fýtbolshynyń kem oınaǵanyna qaramastan almatlyq klýb alǵa qaraı umtyldy. Nátıjesinde 75-mınýtta Aleksandr Martynovıch tarazy basyn teńestirse, 87-mınýtta Dastan Sátpaev bıylǵy birinshiliktegi segizinshi golyn soǵyp, komandasyna jeńis syılady. Osylaısha «Qaırat» syrt alańda qarsylasyn 2:1 esebimen jeńip, týrnır kestesinde 26 upaımen ekinshi orynǵa kóterildi.

Sondaı-aq búgin elordalyq «Astana» syrt alańda Semeıdiń «Elimaı» komandasyn 2:0 esebimen jeńse, Qostanaıdyń «Tobyly» óz alańynda «Atyraýdy» 5:0 esebimen súrindirdi.  Al astanalyq «Jeńis» pen shymkenttik «Ordabasy» kezdesýinde 2:2 esebi tirkeldi.

Endi erteń, 31 mamyrda «Ulytaý» (Jezqazǵan) men «Turan» (Túrkistan), «Oqjetpes» (Kókshetaý) men «Qyzyljar» (Petropavl), «Qaısar» (Qyzylorda) men «Jetisý» (Taldyqorǵan) oınaıdy.