QPL: Chempıondyqqa tartys qyza tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiligi 28-týrynyń tórt oıyny ótkizildi, dep habarlaıdy QazAqparat tilshisi.
Esterińizge sala ketelik, keshe bul týrda eki oıyn ótkizildi. Óz alańynda «Ertis» «Shahterdi» 4:2 esebimen jeńiske jetse, «Tobyl» men «Jetisý» komandalary 0:0 esebimen teń tústi.
Búgingi alǵashqy kezdesý «Atyraý» men «Oqjetpes» komandalary arasynda ótti. Bul oıynda eki komanda 2:2 esebimen teń tústi. Oıynnyń 25-mınýtynda kókshetaýlyq Alves Danılo Almeıda esep ashsa, alań ıeleri qatarynan Islamnýr Abdýlavov 30-mınýtta tarazy basyn teńestirdi. Al 35-mınýtta atyraýlyq Petr Gjelchak óz komandasyn alǵa shyǵardy. Qorytyndy esepti 65-mınýtta «Oqjetpes» oıynshysy Mılan Stoıanovıch belgiledi.
Dál osyndaı «Aqtóbe» men «Taraz» komandalary arasyndaǵy kezdesýde de tirkeldi. Týrnır kestesinde kósh sońynda kele jatqan qos komanda jeńiske jetýge bar kúshin saldy. Oıyn barysynda «Taraz» fýtbolshysy Álisher Súleı 38-mınýtta esep ashty. Ekinshi kezeńniń 47-mınýtynda alań ıeleri sapynan Rústem Temirhan tarazy basyn teńestirdi. Al 64-mınýta tarazdyq Rıbeıro Dantasa Elıvelto qarsylastar qaqpasyn dál kózdese, 84-mınýtta aqtóbelik Álisher Ázimov mergendik tanytty.
Al Nur-Sultan men Almaty qalalaryndaǵy oıyndar bir ýaqytta bastaldy. Elordada «Astana» Qyzylordanyń «Qaısar» komandasyn qabyldady. «Astana» úshin qazir árbir oıynnyń mańyzy bolyp tur. Bıyl chempıondyq ataqqa birneshe komanda júrgizip keledi. Sondyqtan búgingi kezdesýde «Astanaǵa» upaı joǵaltýǵa bolmaıtyn edi. Birinshi kezeńde «Astana» sapynan 14-mınýtta Abzal Beısebekov esep ashsa, odan keıin 24-mınýtta Sergeı Hıjnıchenko esepti ulǵaıta tústi. Ol 58-mınýtta taǵy bir goldyń avtory atandy. Osylaısha «Astana» 3:0 esebimen jeńiske jetti.
Al Almatyda jergilikti «Qaırat» Shymkenttiń «Ordabasy» klýbymen oınady. Oıynnyń birinshi kezeńinde almatylyqtar qatarynan 41-mınýtta Aderınsoala Eseola mergendik tanytty. Al 45-mınýtta Marton Eppel gol soqsa, ol 68-mınýtta qos goldyń avtory atandy. «Ordabasy» sapynan 84-mınýtta Tımýr Dosmaǵambetov esep aıyrmasyn qysqartty. Oıynnyń 90-mınýtta almatylyq klýb qatarynan Vıacheslav Shvyrev qorytyndy esepti belgiledi. Oıynda «Qaırat» 4:1 esebimen basym tústi.
Týrnır kestesinde «Tobyl» 59 upaımen kósh bastap keledi. Odan keıingi oryndarda 56 upaımen «Astana» men «Qaırat» komandalary keledi. Osylaısha chempıondyqqa talas qyza tústi.
Al 29-týr oıyndary 5, 6 jáne 30 qazan kúnderi ótkiziledi. Aldymen 5 qazanda «Oqjetpes» pen «Taraz», «Qaırat» jáne «Aqtóbe», «Jetisý» men «Ertis», 6 qazanda «Ordabasy» men «Astana» komandalary kezdesedi. Bul týrdaǵy «Qaısar» men «Tobyl», «Shahter» men «Atyraý» arasyndaǵy kezdesý 30 qazanǵa aýystyryldy. Óıtkeni, 6 qazan kúni Qazaqstan kýbogynyń fınalynda «Qaısar» men «Atyraý» komandalary sheberlik baıqasady.
