QPL: «Atyraý» bıylǵy birinshiliktegi úshinshi jeńisine jetti

ASTANA. KAZINFORM — Búgin fýtboldan Premer-lıga komandalary arasyndaǵy el birinshiliginiń HHІІІ-týrynyń alǵashqy oıyn kúniniń nátıjesi belgili boldy. 

Bul kúni qazaqstandyq jankúıerler «Atyraý» men «Tobyl» (Qostanaı) kezdesýine erekshe qyzyǵýshylyq bildirdi. Atyraýlyq klýb bıylǵy birinshilikti sátsiz ótkizdi. Qazirge deıin týrnır kestesinde sońǵy orynnyń birin mise tutty. 

Al «Tobyldyń» jaǵdaıy basqasha. Bas júldege qol sozýdy qalaıdy. Qazir úzdik úshtikte keledi. «Astana» jáne «Qaırat» sekildi qarsylastarymen chempıondyq ataqqa qol sozýǵa talas júrgizip keledi.

Búgingi kezdesý taǵdyryn «Atyraý» sapynan 66-mınýtta ıAn Trýfanov soqqan jalǵyz gol sheshti.
Osylaısha qarsylasynan 1:0 esebimen basym túsken komanda týrnır kestesinde 15 upaımen túrkistandyq «Turanmen» teńesti.

Sondaı-aq búgin petropavldyq «Qyzyljar» Kókshetaýdyń «Oqjetpesin» 3:1 esebimen jeńdi.
Dál qazir «Ordabasy» (Shymkent) men «Jeńis» (Astana), «Turan» (Túrkistan) men «Ulytaý» (Jezqazǵan) oınap jatyr.

Endi 14 qyrkúıekte 17:00–de «Qaırat» (Almaty) pen «Aqtóbe», 19:00–de «Astana» men «Elimaı» (Semeı) sheberlik aıqasady.

Sondaı-aq 16 qyrkúıekte 15:00–de «Jetisý» (Taldyqorǵan) men «Qaısar» (Qyzylorda) oınaıdy.