QPL: «Astana» jaǵdaıyn qıyndatyp aldy
ShYMKENT. QazAqparat - Búgin fýtboldan Premer-lıga komandalary arasyndaǵy el birinshiligi 29-týrynyń taǵy bir oıynynda Shymkentte jergilikti «Ordabasy» men elordalyq «Astana» komandalary kezdesti, dep habarlaıdy QazAqparat tilshisi.
Bul kezdesýde teń nátıje tirkeldi. Oıyn barysynda 15-mınýtta «Ordabasy» sapynan Temirlan Erlanov penaltıden esep ashqan edi. Al 51-mınýtta Joao Paolo tarazy basyn teńestirdi. Oıyn 1:1 esebimen aıaqtaldy.
Aıta keterligi, eki komanda da bıyl chempıondyq ataq pen júldeli orynnan kórinýge tyrysyp keledi. Sondyqtan teń nátıje eki komandany da qanaǵattandyra qoımaıdy. Ásirese, sońǵy tórt jylda qatarynan chempıon atanyp kelgen «Astana» qalǵan bes kezdesýde de jeńiske jetýi tıis. Olar «Qaırat», «Aqtóbe», «Oqjetpes», «Tobyl», «Ertis» komandalarymen kezdesedi.
Bul týrdaǵy «Qaısar» men «Tobyl», «Shahter» men «Atyraý» arasyndaǵy kezdesý 30 qazanǵa aýystyryldy. Búgin, 6 qazanda Qazaqstan kýbogynyń fınalynda «Qaısar» «Atyraý» komandasynan basym túsip, atalmysh týrnırdiń jeńimpazy atandy.
Qazir týrnır kestesi 29 oıynnan keıin «Qaırat» 62 upaımen kósh bastap keledi. Odan bir oıyn ótkizgen «Tobyldyń» 59, «Astananyń» 57 upaıy bar.
Endi 30-týr oıyndary 19 jáne 20 qazan kúnderi ótedi. Aldymen 19 qazanda «Ertis» pen «Qaısar», «Atyraý» men «Jetisý» komandalary kezdesse, 20 qazanda «Tobyl» men «Ordabasy», «Taraz» ben «Shahter», «Astana» men «Qaırat», «Aqtóbe» men «Oqjetpes» komandalary oınaıdy.
