QPL: «Astana» týrnırlik kestede kósh bastady

ASTANA. KAZINFORM - Búgin fýtboldan Premer-lıga komandalary arasyndaǵy Qazaqstan chempıonatynyń tórtinshi týryndaǵy alǵashqy kúngi nátıjeler belgili boldy. 

Atalǵan týrdyń alǵashqy oıyn kúninde jankúıerler «Astana» men «Ordabasy» (Shymkent) kezdesýine nazar aýdardy.

Elordalyq komanda bıyl bas júldege qol sozýdy qalaıdy. Sondyqtan árbir kezdesýde upaı joǵaltpaýǵa kúsh salyp keledi. Al ótken jyldarda júldeli oryndardan kórinip júrgen «Ordabasy» bıyl sátsiz oıyn kórsetip júr. Týrnır kestesinde sońǵy oryndy mise tutqan olar búgin úsh upaı oljalaýǵa kúsh salatyny anyq edi.

Kezdesý barysynda komandalar tartysty oıyn ótkizdi. «Astana» sapynan Ýsman Kamara 34, 58-mınýtta gol soqsa, oǵan 41-mınýtta shymkenttik klýbtan Sultanbek Astanov bir golmen jaýap qaıyrdy. Osylaısha «Astana» qarsylasynan 2:1 esebimen basym túsip, týrnır kestesinde 10 upaımen kósh basyna shyqty.

Al, túrkistandyq «Turan» syrt alańda Petropavldyń «Qyzyljarynan» 3:2 esebimen basym tústi. Qostanaıdyń «Tobyly» syrt alańda kókshetaýlyq «Oqjetpesti» 1:0 esebimen tize búktirse, taldyqorǵandyq «Jetisý» men astanalyq «Jeńis» 0:0 esebine qanaǵat bildirdi.

6 cáýirde «Atyraý» men «Qaırat» (Almaty), «Aqtóbe» men «Qaısar» (Qyzylorda), «Elimaı» (Semeı) men «Ulytaý» (Jezqazǵan) sheberlik baıqasady.

Oıyndardy «Qazsport» jáne «Sport Plus Qazaqstan» telearnalary tikeleı efırde kórsetedi.

Buǵan deıin fýtboldan el birinshiliginiń tórtinshi týr oıyndary ótetinin habarlaǵan edik.