QPL: «Astana» týrnır kestesinde birinshi orynǵa kóterildi

ASTANA. KAZINFORM - Búgin fýtboldan Qazaqstan Premer-lıgasynyń HHІV-týry aıasynda kókshetaýlyq «Oqjetpes» pen «Astana» komandalary kezdesti. 

Іshki birinshilikte «Astana» bas júldege almatylyq «Qaıratpen» talas júrgizip keledi. Sondyqtan olarǵa árbir kezdesýde upaıdan shashaý shyǵarmaý mańyzdy. Al kókshelikter týrnırlik kesteniń orta tusyna ornyǵyp, Premer-lıgadaǵy ornyn saqtap qalý máselesin tolyqtaı sheship alǵan. 

Chempıondyqqa talasyp jatqan elordalyq komanda tóreshiniń ysqyryǵy estile sala birden shabýylǵa kóńil bólip, jyldam gol soǵyp alýdyń amalyn izdedi. Urymtal sátterdiń birinde aıyp alańynyń ishinde oıyn tártibi buzylyp, bas qazy «Oqjetpes» qaqpasyna 11 metrlik aıyp dobyn belgiledi. Nazmı Grıpshı múlt ketken joq. Osylaısha nebári oıynnyń 5-mınýtynda esep ashyldy. Al ekinshi gol kezdesýdiń 81-mınýtynda soǵyldy. Penaltı oryndaýdyń sheberine aınalǵan Grıpshı dýbl avtory atanyp, birinshilikte soqqan goldarynyń sanyn 15-ke jetkizdi.
Match aıaqtalar tusta kókshetaýlyqtar esep aıyrmasyn qysqartyp, bir golmen jaýap qaıyrdy.
Nátıjesinde «Astana» qarsylasyn 2:1 esebimen jeńip, týrnır kestesinde birinshi orynǵa kóterildi.

Aıta ketsek, 27 qyrkúıekte Jezqazǵannyń «Ulytaýyn» óz alańynda «Atyraýǵa» 1:5 esebimen ese jiberse, astanalyq «Jeńis» Túrkistannyń «Turanyn» 6:3, «Aqtóbe» petropavldyq «Qyzyljardy» 1:0 esebimen jeńdi.

Endi «Elimaı» (Semeı) men «Ordabasy» (Shymkent), «Tobyl» (Qostanaı) men «Qaısar» (Qyzylorda) sheberlik baıqasady.

Sondaı-aq 5 qazanda «Qaırat» (Almaty) pen «Jetisý» (Taldyqorǵan) oınaıdy.