QPL: «Astana» «Tobyldan» basym tústi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń 17-týrynda Qostanaıdyń «Tobyly» óz alańynda Nur-Sultannyń «Astana» komandasyn qabyldady, dep habarlaıdy QazAqparat tilshisi.
Atalmysh eki komanda týrnır kestesinde birinshi jáne ekinshi oryndy ózara bólisip tur. Sondyqtan búgingi kezdesýge ekeýi de tyńǵylyqty daıyndaldy.
Kezdesý tartysty jaǵdaıda órbidi. Qos klýb ta gol soǵý múmkindigin izdedi. Degenmen oıynnyń birinshi kezeńi teń nátıjemen aıaqtaldy.
Ekinshi kezeńniń 64-mınýtynda «Astana» oıynshysy Rýnar Sıgýronsson esep ashty. Aıta keterligi, Islandııa quramasynyń jartylaı qorǵaýshysy elordalyq klýb sapyna jaqynda ǵana qosyldy. Búgingi oıynda bizdiń elimizdiń birinshiligindegi alǵashqy golyn soǵyp otyr. Al 77-mınýtta «Astananyń» taǵy bir jartylaı qorǵaýshysy Marın Tomasov esepti ústemeleı tústi. Osylaısha «Astana» «Tobyldy» 2:0 esebimen jeńip ketti.
Aıta ketelik, eki komanda da kelesi aptada bizdiń elimizdiń atynan eýrokýbok oıyndaryna qatysady. Elordalyq klýb 9 shildede ÝEFA Chempıondar lıgasynyń birinshi kezeńinde Rýmynııanyń ChFR klýbyn qabyldaıdy. Al «Tobyl» 10 shildede ÝEFA Eýropa lıgasy birinshi kezeńinde Lıýksembýrgtiń «Jenees Esh» klýbyna qonaqqa barady.
Dál qazir Almatyda jergilikti «Qaırat» pen Shymkenttiń «Ordabasy» komandalary kezdesip jatyr. Ázirge esep ashylǵan joq.
Aıta keterligi, 17-týrdyń qalǵan oıyndary 6 shildede ótkiziledi. Bul kúni «Taraz» ben «Aqtóbe», «Qaısar» men «Shahter», «Ertis» pen «Oqjetpes», «Atyraý» men «Jetisý» komandalary kezdesedi.
Al 18-týr oıyndary 13 jáne 14 shilde kúnderi ótkiziledi. 13 shildede «Jetisý» men «Ertis», «Aqtóbe» men «Shahter», 14 shildede «Ordabasy» men «Tobyl», «Oqjetpes» pen «Taraz», «Qaırat» pen «Qaısar» oınaıdy.
