QPL: «Astana» «Taraz» komandasynan jeńilip qaldy
NUR-SULTAN. QazAqparat - Búgin fýtboldan Premer-lıga komandalary arasynda Qazaqstan chempıonatynyń 17-týry máresine jetti, dep habarlaıdy QazAqparat tilshisi.
Atalǵan týrdaǵy sońǵy oıynda Jambyl oblysynyń «Taraz» jáne elordalyq «Astana» komandalary kezdesti. Jambyldyq klýb buǵan deıin týrnır kestesinde toǵyzynshy orynda tursa, elordalyq komanda tórtinshi orynǵa jaıǵasqan bolatyn. Sondyqtan eki komanda úshin de jeńiske jetý aýadaı qajet edi.
Kezdesýde «Taraz» fýtbolshylary jınaqy qımyl kórsetti. Nátıjesinde olardyń qatarynan 33-mınýtta Serj Nıýadzı mergendigimen kózge tústi. Osylaısha «Taraz» azýly qarsylasyn 1:0 esebimen jeńip ketti.
Sondaı-aq, atalǵan týrda «Tobyl» «Qaısardy» 3:0, «Shahter» «Oqjetpesti» 2:1 esebimen jeńse, «Qyzyljar» men «Kaspıı» 1:1 esebimen teń oınady.
Al Almatynyń «Qaıraty» Shymkenttiń «Ordabasy» klýbyn 3:0 esebimen jeńip, óz tarıhynda 16 jyldan keıin úshinshi márte chempıondyq ataqqa qol jetkizdi.
Endi komandalar el birinshiliginde azdaǵan úziliske shyǵady. Fýtboldan Qazaqstan quramasy Ulttar lıgasynda 12 jáne 15 qarasha kúnderi kezekti oıyndaryn ótkizedi.
