QPL: «Astana» syrt alańda «Atyraýdy» oısyrata jeńdi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń keıinge qaldyrylǵan 23 týr oıyny bolyp ótti. Bul oıynda «Atyraý» óz alańynda elordalyq «Astana» komandasyn qabyldady, dep habarlaıdy QazAqparat tilshisi.
Týrnır kestesinde kósh sońynda kele jatqan «Atyraý» bıyl da chempıondyqqa úmitkerler qataryndaǵy «Astanaǵa» laıyqty qarsylyq kórsete alǵan joq. Elordalyq klýb qatarynan tórt gol soqty. Aldymen «Astana» sapynan 13-mınýtta Lýka Shımýnovıch esep ashsa, 15-mınýtta onyń komandalas áriptesi Marın Tomasov mergendik tanytty. Marın Tomasov 33-mınýtta taǵy da gol soǵyp esepti ulǵaıta tústi. Al 44-mınýtta elordalyq Dorın Rotarıý qarsylastar qaqpasynyń toryn týlatty. Alań ıeleri qatarynan 89-mınýtta Qýanysh Qalmuratov qorytyndy esepti belgiledi. Osylaısha «Astana» 4:1 esebimen jeńiske jetti. Týrnır kestesinde jaǵdaıyn jaqsartyp, úzdik úshtikti túıindep tur. Alda - Qostanaıdyń «Tobyly» men Almatynyń «Qaıraty». Chempıondyq atalmysh úsh komanda arasynda júrip jatyr.
Endi 28-týr oıyndary 28 jáne 29 qyrkúıek kúnderine josparlanǵan. 28 qyrkúıekte «Tobyl» men «Jetisý», «Ertis» pen «Shahter», «Astana» men «Qaısar», kelesi kúni «Qaırat» pen «Ordabasy», «Atyraý» men «Oqjetpes», «Aqtóbe» men «Taraz» komandalary oınaıdy.
Foto: fcastana.kz
