QPL: «Astana» Pavlodarda «Ertisti» oısyrata jeńdi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń 19-týrynyń aldyn ala bir oıyny ótkizildi. Bul kezdesýde Pavlodarda jergilikti «Ertis» elordanyń «Astana» komandasyn qabyldady, dep habarlaıdy QazAqparat tilshisi.
Bıyl «Ertis» komandasy sylbyr oıyn kórsetip keledi. Qazir 11-týrdan keıin týrnır kestesinde nebári 9 upaımen 10-orynda tur. Al «Astana» birinshilikti sátti bastady. Týrnır kestesinde kósh bastap keledi. Degenmen sońǵy týrlarda qarsylastaryna ese jiberip qoıyp júr. Aıta keterligi, eki komanda 5 mamyrda Nur-Sultanda 9-týr oıyndaryn ótkizgen edi. Bul kezdesýde kútpegen jerden «Astana» «Ertiske» 0:1 esebimen jol berip qoıdy Elordalyq klýb odan keıin 12 mamyrda syrt alańda «Taraz» komandasynan jeńilip qaldy.
Búgingi kezdesýde «Astana» alǵash bolyp esep ashty. Ony 40-mınýtta Djýnıor Kabananga oryndady. Al 60-mınýtta elordalyq klýb sapynan Marın Tomasov esepti ústemeleı tústi. Ol 85-mınýtta taǵy bir goldyń avtory atansa, 90-mınýtta «Astana» shabýylshysy Romelo ıAnga qorytyndy esepti belgiledi. Osylaısha «Astana» 4:0 esebimen jeńiske jetti. Elordalyq klýb bıylǵy birinshiliktegi toǵyzynshy jeńisine qol jetkizse, «Ertis» jetinshi márte qarsylastaryna ese jiberdi.
Endi 11-týr oıyndary 18 jáne 19 mamyr kúnderi ótkiziledi. Bul kúnderi «Oqjetpes» pen «Qaısar», «Jetisý» men «Aqtóbe», «Tobyl» men «Atyraý», «Ordabasy» men «Taraz», «Qaırat» pen «Ertis», «Astana» men «Shahter» sheberlik baıqasady.
Foto: www.fcastana.kz
