QPL: «Astana» «Ordabasymen» kezdesti
ASTANA. QazAqparat - Búgin, 20 qazanda fýtboldan Premer-lıga komandalary arasyndaǵy el birinshiligi qaıta jalǵasty. El birinshiligindegi 30-týr oıyndaryn «Astana» men «Ordabasy» komandalary bastady, dep habarlaıdy QazAqparat tilshisi.
«Astana» jeńiske jetken jaǵdaıda úsh týr buryn chempıondyq ataqqa qol jetkizetin edi. Olar basty qarsylasy - Almatynyń «Qaıratynan» 10 upaı alda turdy. Dese de chempıondyq ataq bul týrda sheshilmeıtin boldy. Onyń taǵdyry kelesi týrda anyqtalýy múmkin.
Búgingi oıynǵa keletin bolsaq, birinshi kezeńde eki komanda da bir-biriniń qaqpasynan sańylaý taba almady. Alǵashqy gol 54-mınýtta soǵyldy. Ony «Astana» sapynan Marın Tomasov óziniń enshisine jazdy. Degenmen, olardyń qýanyshy kópke sozylǵan joq. Arada eki mınýt ótkende «Ordabasy» sapynan Jasulan Moldaqaraev mergendik tanytty. Esep - 1:1. Oıyn sońyna deıin osy esep ózgergen joq.
Bul týrdaǵy qalǵan oıyndar 21 qazanda ótkiziledi. Atap aıtqanda, «Shahter» men «Ordabasy», «Qyzyljar» men «Jetisý», «Qaırat» pen «Tobyl», «Atyraý» men «Aqjaıyq», «Ertis» pen «Qaısar» komandalary oınaıdy.
«Astana» endi Eýropa lıgasy toptyq kezeńindegi úshinshi týr oıyndaryna daıyndalady. Bul kezdesý syrt alańda 25 qazanda Chehııanyń «ıAblonets» komandasymen bolady. Esterińizge sala ketelik, «Astana» budan buryn syrt alańda Ýkraınanyń «Dınamo» (Kıev) komandasymen 2:2 esebimen teń túsip, óz alańynda Frantsııanyń «Renn» klýbyn 2:0 esebimen tize búktirgen edi.
