QPL: «Astana» men «Qaırat» sońǵy týrda chempıondyqqa talasady

ASTANA. KAZINFORM - Fýtboldan Qazaqstan Premer-lıgasynyń HHV týry máresine jetti. 

Bul kúni jankúıerler nazary «Astana» men «Aqtóbe» kezdesýine aýdy. Elordalyq klýb áli de bas júldege tasty toqtatpady. Aqtóbelik fýtbolshylar da aldaǵy jyly eýrokýbok oıyndaryna qatysýǵa múmkindik beretin tórtinshi orynǵa úmitker bolyp otyr. Sondyqtan eki komanda alǵashqy mınýttan ashyq fýtbolǵa kóshti.

Aldymen elordalyq klýbtan Djeffrı Chınedý 10-mınýtta esep ashsa, oǵan aqtóbelik komandadan Jaıro Jan 13-mınýtta bir golmen jaýap qaıyrdy. Soǵan qaramastan «Astana» jasyl alań tórinde belsendi oıyn órnegin kórsetip, taǵy eki gol soǵyp úlgerdi. Ony Ýsman Kamara 23, Djeffrı Chınedý 34-mınýtta óziniń enshisine jazdy. 

Al «Aqtóbe» sapynan Danıel Sosa 40-mınýtta esep aıyrmasyn qysqartty. Odan keıin astanalyq klýbtan Nazmı Grıpshı 45-mınýtta mergendik tanytyp, bıylǵy birinshiliktegi óziniń 16-shy golyn toılady.

Sondaı-aq Djeffrı Chınedý 50-mınýtta het-trıktiń avtory atansa, 62-mınýtta aqtóbelik klýbtan Artýr Shýshenachev qorytyndy esepti belgiledi.

Osylaısha «Astana» qarsylasynan 5:3 esebimen túsip, ekinshi orynǵa turaqtap tur. Qazir olardyń enshisinde 56 upaı bar. Kósh basyndaǵy «Qaırattan» eki upaıǵa qalyp keledi. 

Bas júlde taǵdyry 26 qazanda ótetin eki komandanyń ózara kezdesýi sheshedi. 

Al shymkenttik «Ordabasy» óz alańynda Kókshetaýdyń «Oqjetpesin» 7:1 esebimen tize búktirdi.

Aıta ketsek, budan buryn qostanaılyq «Tobyl» syrt alańda taldyqorǵandyq «Jetisýdy» 2:1 esebimen jeńdi. 

Atalǵan týrda 17 qazanda almatylyq «Qaırat» syrt alańda petropavldyq «Qyzyljardy» 1:0 esebimen jeńdi.

Eske salsaq, 18 qazanda «Ulytaý» (Jezqazǵan) men «Qaısar» (Qyzylorda), «Atyraý» men «Jeńis» (Astana) 1:1 esebimen teń tússe, túrkistandyq «Turan» óz alańynda semeılik «Elimaıǵa» 3:6 esebimen ese jiberdi.