QPL: «Astana» kósh tizginin qaıta qolǵa aldy
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń besinshi týry máresine jetti. Atalmysh týrdaǵy sońǵy kezdesý elordada «Astana» men Shymkenttiń «Ordabasy» komandalary arasynda ótti, dep habarlaıdy QazAqparat tilshisi.
«Astana» men «Ordabasy» arasyndaǵy kezdesý jankúıer tarapynan erekshe qyzyǵýshylyq týǵyzǵany ras. Eki komanda da týrnır kestesinde aldyńǵy oryndarda keledi. Sondyqtan oıynnyń tartysty ótetin belgili edi.
Kezdesý barysy da solaı órbidi. Alań ıeleri tezirek gol soǵý múmkindigin qarastyrdy. Kózdegen maqsatyna astanalyqtar 15-mınýtta jetti. Olardyń qatarynan Dorın Rotarıý mergendik tanytty. Birinshi kezeń aıaqtalar tusta Toqtar Jańǵylyshbaı tarazy basyn teńestirdi. Bul 44-mınýt bolatyn.
Atalmysh esep 86-mınýtqa deıin saqtalyp turdy. Alań ıeleri úshin teń nátıje qolaısyz sanalady. Ár jyly aldyna chempıondyq ataqqa qol jetkizýdi maqsat etetin «Astana» oıyn sońyna taman belsendilik tanytty. Osyndaı shabýyldyń birinde Marın Tomasov óz komandasyna jeńis syılaǵan gol soǵyp ketti. Osylaısha elordalyq klýb búgingi qarsylasyn 2:1 esebimen jeńip, týrnır kestesinde qaıtadan kósh basyna shyqty.
Nátıjesinde «Astana» týrnır kestesinde qaıtadan kósh basyna shyqty. Degenmen bul komandanyń ekinshi oryndaǵy «Tobyldan» bir oıyny artyq.
Endi 6-týr oıyndary 20 sáýirde ótkiziledi. Bul kúni «Atyraý» men «Oqjetpes», «Ertis» pen «Aqtóbe», «Qaırat» pen «Astana», «Qaısar» men «Ordabasy», «Taraz» ben «Shahter», «Tobyl» men «Jetisý» komandalary kezdesedi.
Buǵan deıin bes oıynnyń nátıjesi jaıynda habarlaǵan bolatynbyz. Aldymen óz alańynda Kókshetaýdyń «Oqjetpesi» Qostanaıdyń «Tobylynan» 1:2 esebimen jeńilse, Qaraǵandynyń «Shahteri» Pavlodardyń «Ertisin» 4:0, «Aqtóbe» «Atyraýdy» 2:0 esebimen tize búktirdi. Odan keıin «Taraz» Qyzylordanyń «Qaısaryna» 1:2 esebimen jol berse, Taldyqorǵanda «Jetisý» Almatynyń «Qaıratyn» 3:0 esebimen oısyrata jeńdi.
