QPL: «Astana» qatarynan úshinshi márte jeńiske jetti

ASTANA. KAZINFORM - Búgin fýtboldan Premer-lıga komandalary arasyndaǵy el birinshiliginiń 11-týryndaǵy úsh oıynnyń nátıjesi belgili boldy.

Elordalyq «Astana» syrt alańda Semeıdiń «Elimaı» komandasyn 2:0 esebimen jeńdi. Oıyn barysynda olardyń qatarynan Ramazan Kárimov 32, Ýsman Kamara 54-mınýtta mergendik tanytty.

Semeılik klýb sońǵy bes kezdesýde nebári bir márte jeńiske jetse, astanalyq komanda qatarynan úshinshi márte qarsylastaryn qapy qaldyryp otyr. Olar týrnır kestesinde 27 upaımen birinshi orynǵa shyqty.

Taǵy bir kezdesýde Qostanaıdyń «Tobyly» óz alańynda «Atyraýdy» 5:0 esebimen súrindirdi. Qostanaılyq klýbtan Aleksandr Zýev 14, Islam Chesnokov 16, Ahmed El-Messaýdı 42, Roman Asrankýlov 78, Jaslan Jumashev 85-mınýtta gol soqty. Osylaısha atyraýlyq ujym qatarynan on úshinshi márte jeńilip qaldy.

Al astanalyq «Jeńis» pen shymkenttik «Ordabasy» kezdesýinde 2:2 esebi tirkeldi. Elordalyq komanda sapynan Nurbol Ánýarbekov 3, Aslan Ádil 38-mınýtta óz komandasyn alǵa shyǵarǵan edi. Degenmen ekinshi kezeńde shymkenttik klýb sapynan Sergeı Malyı 71, Zıkrıllo Sýltanııazov 90-mınýtta eki gol soǵyp, tarazy basyn teńestirip ketti. Nátıjesinde «Jeńis» bıyl jetinshi márte teń tússe, «Ordabasy» ekinshi oıyn qatarynan jeńistiń kiltin taba alar emes.

Dál qazir «Aqtóbe» men «Qaırat» (Almaty) kezdesýi ótip jatyr. Ázirge esep - 0:0.

Buǵan deıin Qazaqstan Premer-lıgasynyń 11-týr oıyndary bastalatynyn jazǵan edik. 

Erteń, 31 mamyrda «Ulytaý» (Jezqazǵan) men «Turan» (Túrkistan), «Oqjetpes» (Kókshetaý) men «Qyzyljar» (Petropavl), «Qaısar» (Qyzylorda) men «Jetisý» (Taldyqorǵan) oınaıdy.