QPL: «Astana» Qaraǵandydan jeńilip, «Qaırat» sátsizdik serııasyn toqtatty
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń 11-týry márege jetti, dep habarlaıdy QazAqparat tilshisi.
Elordada «Astana» Qaraǵandynyń «Shahterin» qabyldady. Bul oıynda alań ıeleri esep ashty. «Astana» sapynan 34-mınýtta Roman Murtazaev gol soqty. Al ekinshi kezeńde «Shahter» oıynshylary alǵa umtyldy. Nátıjesinde 78-mınýtta Marat Shahmetov tarazy basyn teńestirdi. Al 84-mınýtta Sergeı Zenev «Shahter» komandasyn alǵa shyǵardy. «Astana» oılamaǵan jerden «Shahterge» 1:2 esebimen jol berip qoıdy.
Al Almatyda «Qaırat» Pavlodardyń «Ertis» klýbymen sheberlik baıqasty. Bul oıynda da alań ıeleri alǵash bolyp esep ashty. Ony 6-mınýtta Aderınsola Eseola sheber oryndady. Degenmen Rodjer Kanıas 34-mınýtta tarazy basyn teńestirgen edi. Al 41-mınýtta Aderınsola Eseola búgingi kezdesýdegi ekinshi golyn soǵyp, óz komandasyn alǵa shyǵardy. Oıyn sońyna deıin osy esep saqtaldy. Almatylyq klýb atalmysh qarsylasyn 2:1 esebimen tize búktirdi. «Qaırat» tórt oıyn boıy jeńiske jete almaı kelgen edi. Sol sátsizdik serııasyn toqtatty.
Esterińizge sala ketelik, 11-týrdyń tórt oıyny keshe, 18 mamyrda ótkizildi. Óz alańynda Qostanaıdyń «Tobyly» «Atyraý» komandasyn 3:0 esebimen tize búktirse, syrt alańda Qyzylordanyń «Qaısary» Kókshetaýdyń «Oqjetpesinen» 2:1 esebimen basym tústi. Al Taldyqorǵandaǵy «Jetisý» men «Aqtóbe» arasyndaǵy oıynda jeńimpaz anyqtalǵan joq. Esep - 1:1. Al Shymkentte «Ordabasy» «Tarazdy» 3:0 esebimen oısyrata jeńdi. Atalmysh týrdan keıin alǵashqy aınalym máresine jetti.
Ekinshi aınalym oıyndary 26 mamyrda bastalady. Bul kúni «Jetisý» men «Qaısar», «Aqtóbe» men «Ordabasy», «Ertis» pen «Atyraý», «Oqjetpes» pen «Astana», «Taraz» ben «Tobyl», «Shahter» men «Qaırat» komandalary kezdesedi.
