QPL: «Astana» ekinshi orynǵa kóterildi

ASTANA. KAZINFORM - Elordalyq «Astana» fýtboldan Premer-lıga komandalary arasyndaǵy Qazaqstan chempıonatynyń altynshy týrynda «Atyraý» komandasynan basym tústi.

Ótken týrda «Turanmen» teń túsken astanlyq klýb bul joly úsh upaı oljalaýǵa kúsh saldy. Oıynnyń alǵashqy mınýtynan tizgindi óz qolyna ustaýǵa tyrysty. Jyldam gol soǵýǵa tyrysqan komanda degenine nebári birinshi mınýtta jetti.

«Astana» sapynan Djeffrı Chınedý 1-mınýtta esep ashsa, ol 45-mınýtta taǵy bir márte mergendik tanytty.

Ekinshi kezeńde «Atyraý» qatarynan Mıram Sapanov 66-mınýtta esep aıyrmasyn qysqartty.

Osylaısha «Astana» qarsylasyn 2:1 esebimen tize búktirip, týrnır kestesinde ekinshi orynǵa kóterildi.

Al taǵy bir kezdesýde «Aqtóbe» jezqazǵandyq «Ulytaýdy» 1:0 esebimen jeńdi.

Búgin semeılik «Elimaı» syrt alańda taldyqorǵandyq «Jetisýdan» 3:0 esebimen basym tússe, «Oqjetpes» (Kókshetaý) pen «Jeńis» (Astana) 1:1 esebine qanaǵat bildirdi.

Erteń, 27 cáýirde «Qyzyljar» (Petropavl) men «Qaısar» (Qyzylorda) oınasa, «Ordabasy» (Shymkent) men «Turan» (Túrkistan), «Qaırat» (Almaty) pen «Tobyl» (Qostanaı) sheberlik baıqasady.