QPL: «Astana» chempıondyq ataqqa jaqyndaı tústi
ASTANA. QazAqparat - Fýtboldan el birinshiliginde kezekti 29-týr oıyndary Aqtóbe qalasynda túıindeldi. Jergilikti «Aqtóbe» elordalyq «Astana» komandasyn qabyldady, dep habarlaıdy QazAqparat tilshisi.
«Astana» chempıondyq ataqqa bir taban jaqyndaı tústi. Endi nebári 4 týr bar. Elordalyq klýb aldaǵy oıyndarda bir ret ǵana jeńiske jetse, bıylǵy jyldyń bas báıgesin taǵy da ózderi enshileıtin bolady.
Alǵashqy kezeńniń 42-mınýtynda «Astana» shabýylshysy Rangelo ıAnga esep ashyp, óz komandasyn alǵa shyǵardy. Alań ıeleri 55-mınýtta tarazy basyn teńestirgen edi. Bul gol «Aqtóbeniń» qorǵaýshysy Saıat Jumaǵalıdyń enshisine jazyldy. Degenmen 62-mınýtta «Astana» sapynan Serikjan Mýjıkov jeńis dobyn soqty. Oıyn 1:2 esebimen aıaqtaldy.
«Astana» osy týrdan keıin basy qarsylasy - Almatynyń «Qaırat» komandasynan 10 upaıǵa uzaı tústi.
Esterińizge sala ketelik, Qaırat» Shymkentte jergilikti «Ordabasy» klýbynan 0:2 esebimen jeńilip qaldy . Al osy týrdaǵy alǵashqy eki kezdesýde teń nátıje tirkeldi. Al Qostanaıda «Tobyldy» 2:1 esebimen tize búktirgen Pavlodardyń «Ertisi» sońǵy orynnan joǵary kóterildi.
Endi kelesi 30-týr oıyndary araǵa azdaǵan úzilis salyp 20 jáne 21 qazan kúnderi ótkiziledi.
