QPL: «Astana» bıyl alǵash ret jeńildi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń toǵyzynshy týr oıyndary máresine jetti, dep habarlaıdy QazAqparat tilshisi.
Nur-Sultanda «Astana» Pavlodardyń «Ertisin» qabyldady. Atalmysh kezdesýde elordalyqtar kútpegen jerden óz qaqpasyna gol jiberip aldy. «Ertis» sapynan 77-mınýtta Roher Kanıas «Astana» qaqpasyn dál kózdedi. Osylaısha «Astana» bıylǵy dop dodasynda alǵash ret jeńilistiń aşy dámin tatty.
Bul týrdaǵy basty oıyn - Almaty qalasynda ótkizildi. Bas júldeden úmitker qos komanda - Almatynyń «Qaıraty» men Qostanaıdyń «Tobyly» ózara sheberlik baıqasty. Atalmysh kezdesý taǵdyryn 87-mınýtta qaqpaǵa kirgen jalǵyz gol sheshti. Ony qostanaılyq Baýyrjan Turysbek soǵyp ketti. Osylaısha «Qaırat» sońǵy eki týrda qatarynan jeńilip, týrnır kestesindegi jaǵdaıyn qıyndatyp aldy. Atalmysh týrdan keıin «Qaırat» besinshi orynǵa syrǵydy.
Kókshetaý qalasynda jergilikti «Oqjetpes» Qaraǵandynyń «Shahter» komandasymen 2:2 esebimen teń tústi. «Oqjetpes» sapynan Darko Zorıch 59, Danılo Alves Almeıda 78-mınýtta gol soqsa, oǵan qaraǵandylyqtar qatarynan Sergeı Zenev 73, 84-mınýttarda qos golmen jaýap qaıyrdy.
Taldyqorǵannyń «Jetisýy» óz alańynda «Taraz» komandasyn 1:0 esebimen tize búktirdi. Jalǵyz goldy 54-mınýtta Eljas Altynbekov óziniń enshisine jazdy. Budan keıin «Jetisý» týrnır kestesinde tórtinshi orynǵa kóterildi.
Shymkenttiń «Ordabasy» klýby sońǵy bes týrdan beri jeńiske jete almaı keledi. Bes týr ishinde tórt márte teń nátıjege qanaǵat bildirse, bir márte qarsylasyna ese jiberdi. Olar búgin de óz alańynda «Atyraý» komandasymen 1:1 esebimen teń tústi. «Ordabasy» oıynshysy 54-mınýtta Pablo Fontanello 54, atyraýlyq Vladımır Vomenko 71-mınýtta qanjyǵasyn maılady.
Qyzylordanyń «Qaısar» klýby syrt alańda «Aqtóbemen» kezdesti. Bul oıynnyń birinshi kezeńinde qos komanda tórt gol soqty. «Qaısar» sapynan aldymen 4-mınýtta Aleksandr Marochkın esep ashsa, odan keıin 41-mınýtta Ashat Taǵybergen esepti ústemeleı tústi. Eki gol jiberip alǵan «Aqtóbe» es jınap, 43-mınýtta Abat Aıymbetov qarsylas komanda qaqpasynan sańylaý taýyp ketti. Arada bir mınýttaı ótkende «Qaısardyń» jartylaı qorǵaýshysy Tıgran Barsegıan mergendik tanytty. Osylaısha «Qaısar» atalmysh qarsylasyn 3:1 esebimen jeńdi. Týrnır kestesinde qyzylordalyq klýb besinshi orynǵa kóterildi.
Onynshy týr oıyndary 11 mamyr kúni ótkiziledi. Bul kúni «Aqtóbe» men «Oqjetpes», «Atyraý» men «Qaırat», «Shahter» men «Jetisý», «Ertis» pen «Ordabasy», «Qaısar» men «Tobyl», «Taraz» ben «Astana» komandalary kezdesedi.
