QPL: Alǵashqy eki oıynda «Jetisý» men «Qaısar» jeńiske jetti
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń 22-týry aıasynda eki oıyn ótkizildi, dep habarlaıdy QazAqparat tilshisi.
Bul týr Kókshetaý qalasynda bastaldy. Jergilikti «Oqjetpes» óz alańynda Taldyqorǵannyń «Jetisý» komandasyn qabyldady. Oıyn taǵdyryn jalǵyz dop sheshti. Ony 4-mınýtta taldyqorǵandyq shabýylshy Martın Toshev óziniń enshisine jazdy. Budan keıin qos komanda esepti ózgertýge tyrysty. Tablodaǵy esep sol kúıinshe qaldy. «Jetisý» syrt alańda 1:0 esebimen jeńip, týrnır kestesindegi jaǵdaıyn jaqsartyp aldy.
Taǵy bir oıyn Atyraý qalasynda ótti. Jergilikti «Atyraý» Qyzylordanyń «Qaısar» komandasymen sheberlik baıqasty. Bul kezdesýde «Qaısar» Armenııanyń jartylaı qorǵaýshysy Tıgran Barsegıan ózin jaqsy qyrynan kórsetti. Ol 31-mınýtta penaltı oryndasa, 45-mınýtta taǵy bir márte qaqpany dál kózdedi. Birinshi kezeńde «Atyraý» sapynan Ivan Antıpov bir golmen ajýap qaıyrǵan edi. Tıgran Barsegıan ekinshi kezeńniń 52-mınýtynda taǵy bir márte qanjyǵasyn maılady. Kezdesýde «Qaısar» 3:1 esebimen jeńiske jetti.
Atalmysh týrdaǵy qalǵan tórt oıyn 11 tamyzda ótedi. Bul kúni «Aqtóbe» men «Astana», «Ertis» pen «Tobyl», «Taraz» ben «Qaırat», «Shahter» men «Ordabasy» komandalary kezdesedi.
