QPL: «Aqtóbe» úzdik úshtikke jaqyndaı tústi
AQTÓBE. QazAqparat - Búgin, 11 tamyzda fýtboldan Premer-lıga komandalary arasyndaǵy el birinshiliginde 22-týr oıyndary ótti, dep habarlaıdy «QazAqparat» HAA.
Aqtóbede jergilikti «Aqtóbe» men Qyzylordanyń «Qaısar» komandasy kezdesti. Atalmysh eki komanda alǵashqy týrda Qyzylorda tórinde sheberlik baıqasqan edi. Ol joly «Aqtóbe» komandasy quramynda negizinen jastar oınady. Óıtkeni, elimizdiń fýtbol federatsııasy tarapynan sol ýaqytta komandaǵa birqatar shekteýler jasalǵan edi. Sonyń saldarynan olar negizgi quramǵa tek jastardy shyǵarýǵa májbúr boldy. Soǵan qaramastan «Aqtóbe» jastary syrt alańda 1:0 esebimen jeńiske jetip, alǵashqy týrda sensatsııa jasady.
Sol ketken eseni «Qaısar» qaıtara ma degen qyzylordalyq jankúıerlerdiń úmiti bar edi. Dese de alań ıeleri oǵan jol bere qoıǵan joq. Sońǵy tórt týrda «Aqtóbe» jeńistiń kermek dámin tatyp kórgen joq. Eki márte jeńiske jetip, eki ret teń tústi. «Qaısarmen» kezdesýde de sol jeńisti jolyn jalǵastyrdy.
Oıynnyń birinshi kezeńinde esep ashylǵan joq. Kezdesýdiń 67-mınýtyna deıin tarazy basy teń turdy. Markos Pızzellıdiń áýelete bergen dobyn Aleksandr Sımchevıch baspen qaqpaǵa baǵyttap «Aqtóbeni» alǵa shyǵardy. Arada úsh mınýt ótkende Rýslan Valıýllın «Qaısar» qaqpasynan sańylaý taýyp, esepti 2:0-ge jetkizdi.
Al 75-mınýtta «Qaısar» esep aıyrmasyn qysqartqan edi. Ony penaltıden Ashat Taǵybergen múltiksiz oryndady. Ol araǵa bes mınýt salyp, tóreshiden qyzyl qaǵaz alyp, alańnan qýyldy.
Aıtpaqshy, bul oıynda stadıondaǵy jaryq birshama ýaqyt sónip qaldy. Osynyń saldarynan tóreshi 90-mınýttan keıin qosymsha 15 mınýt qosýǵa májbúr boldy. Bul múmkindikti alań ıeleri óz paıdasyna jarata bildi. «Aqtóbe» sapynan Jambyl Kókeev gol soǵyp, qorytyndy esepti belgiledi. Esep 3:1. «Aqtóbe» segizinshi jeńisin toılasa, «Qaısar» jetinshi ret jeńiliske ushyrady. «Aqtóbe» týrnır kestesinde tórtinshi orynǵa kóterildi.
Búgin, atalmysh týrda taǵy bir oıyn ótti. Qostanaıda jergilikti «Tobyl» Taldyqorǵannyń «Jetisý» klýbyn 1:0 esebimen tize búktirdi. Al osy týrdaǵy «Aqjaıyq» pen «Astana» arasyndaǵy kezdesý 23 mamyrda ótkizilip, onda oraldyqtar 3:0 esebimen basym túsken edi. Atalmysh týrdaǵy qalǵan oıyndar 12 tamyzda ótkizilip, bul kúni «Qyzyljar» men «Qaırat», «Atyraý» men «Ertis», «Shahter» men «Ordabasy» jasyl alańǵa shyǵady. Osymen alǵashqy eki aınalym máresine jetedi. Odan keıin el birinshiliginde qorytyndy úshinshi aınalym bastalady.
