QPL: «Aqtóbe» men «Tobyl» kezdesýinde kim jeńiske jetedi

ASTANA. KAZINFORM – Fýtboldan Premer-lıga komandalary arasyndaǵy el birinshiliginiń HVII týrynda búgin negizgi kezdesý - «Aqtóbe» men «Tobyl» (Qostanaı) oıyny ótedi.

Bul match 20:00-de bastalyp, «Qazsport» telearnasynan tikeleı efırde kórsetiledi.

Eki komanda bıyl týrnır kestesinde bir-birimen qatarlas tur. Qostanaılyq klýb 34 upaımen úzdik úshtikti túıindese, tórtinshi oryndaǵy aqtóbelik klýbtyń enshisinde 32 upaı bar. 

Aıta keterligi, eki komanda arasyndaǵy keıingi bes kezdesýdiń barlyǵynda qostanaılyq klýbtyń mereıi ústem boldy.

Sondaı-aq búgin, 20 shildede 18:00-de «Qyzyljar» (Petropavl) men «Atyraý», 20:00-de «Jetisý» (Taldyqorǵan) men «Ordabasy» (Shymkent) kim myqtyny anyqtaıdy. 

Al 19 shildede semeılik «Elimaı» elordalyq «Jeńiske» 1:2 esebimen jeńilse, «Qaırat» (Almaty) pen «Qaısar» (Qyzylorda) 1:1 esebimen teń tústi. Taǵy bir kezdesýde kókshetaýlyq «Oqjetpes» Jezqazǵannyń «Ulytaýyn» 1:0 esebimen jeńdi.

Atalǵan týrda 18 shildede ótken oıynda «Astana» óz alańynda Túrkistannyń «Turanyn» 7:0 esebimen tize búktirdi.

Surmergender kóshinde Nazmı Grıpshı («Astana») 9 golmen kósh basynda tursa, Dastan Sátpaev («Qaırat»), Marın Tomasov («Astana»), Dáýren Jumat («Oqjetpes») 8 golmen odan keıingi oryndarǵa jaıǵasty.