QPL: «Aqtóbe» men «Qaırat» teń túsip, «Ordabasy» chempıon atandy
ASTANA. KAZINFORM - Búgin fýtboldan Qazaqstan Premer-lıgasynyń HHІV týrynda «Aqtóbe» - «Qaırat» (Almaty) kezdesýiniń nátıjesi belgili boldy.
Ótken týrda óz alańynda shymkenttik «Ordabasyǵa» ese jibergen aqtóbelik ujym bul joly óz jankúıerlerine qýanysh syılaýǵa tyrysty. Eki komandanyń aldyna qoıǵan maqsaty bar. «Aqtóbe» aldaǵy jyly eýrokýbokqa qatysý úshin tórtinshi oryn alýdy kózdese, «Qaırat» bas júldeden áli de úmitin úzgen joq bolatyn. Dese de olar jeńilistiń aşy dámin tatsa, bir týr buryn chempıondyq ataq «Ordabasyǵa» buıyratyn edi.
Kezdesý barysynda aqtóbelik klýbtan Sheıı Odjo 5, Agýstın Pastorıtsa 38-mınýtta gol soqsa, almatylyq klýbtan Azamat Tuıaqbaev 34, Marký Gýal 70-mınýtta qaqpany dál kózdedi.
Osylaısha komandalar 2:2 esebine qanaǵat bildirdi. Nátıjesinde bir týr buryn «Ordabasy» chempıondyq ataqqa qol jetkizdi.
Aıta ketsek, budan buryn «Altaı» (Óskemen) - «Elimaı» (Semeı) 2:2 esebine qanaǵat bildirse, pavlodarlyq «Ertis» «Atyraýdy» 3:2 esebimen jeńdi.
Eske salsaq, alǵashqy oıyn kúni, 24 qazanda petropavldyq «Qyzyljar» Jezqazǵannyń «Ulytaýyn» 1:0, Kókshetaýdyń «Oqjetpesi» Aqtaýdyń «Kaspııin» 3:0 esebimen qapy qaldyrsa, «Jetisý» (Taldyqorǵan) - «Tobyl» (Qostanaı), «Ordabasy» (Shymkent) - «Jeńis» (Astana) 1:1 esebine qanaǵat bildirdi.
