QPL: «Aqtóbe» men «Atyraý» teń tústi

ASTANA. KAZINFORM - Fýtboldan Qazaqstan Premer-lıgasynyń tórtinshi týrynda «Aqtóbe» men «Atyraý» teń tústi.

Bıyl aqtóbelik klýb bas júldege úmitker ujymdardyń qatarynda sanalady. Komanda quramyna kóptegen tájirıbeli fýtbolshy qosyldy. Sondyqtan árbir kezdesýde jeńiske jetýge bar kúshin salyp keledi.

Búgingi kezdesý barysynda komandalar tartysty oıyn ótkizdi. Oıynnyń 11-mınýtynda Ádilhan Tańjaryqov «Aqtóbe» komandasyn alǵa shyǵardy. Budan keıin olardyń tarapynan esepti ulǵaıtatyn birneshe múmkindik bolǵan edi. 

Ekinshi kezeńde komandalar shabýylǵa kóbirek kóńil bóldi. Aqtóbelik ujym basymdyqty arttyrýdy qalasa, atyraýlyq komanda tarazy basyn teńestirýge umtyldy. Nátıjesinde olardyń qatarynan Nıkolaı Sıgnevıch 69-mınýtta múmkindigin múlt jibergen joq. Osylaısha atalǵan oıynda 1:1 esebi tirkeldi.

Aıta ketsek, 6 sáýirde «Qaırat» pen «Jetisý» 0:0 esebine qanaǵat bildirse, «Qyzyljar» «Jeńisten» 4:0, «Elimaı» «Qaısardan» 1:0 esebimen basym tústi. 

Dál qazir «Shahter» men «Astana» kezdesýi ótip jatyr. Ázirge esep - 0:0. Sondaı-aq atalǵan týrdy «Turan» men «Ordabasy» komandalary túıindeıdi.